Juventus a cay den mira di husticia Italiano, cu ta sospecha cu algun dirigente di e club ta envolvi den un supuesto fraude pa beneficia Luis Suarez den e examen di idioma cu e mester a pasa pa haya e ciudadania Italiano y por asina ficha pa e ekipo, Gazzetta dello Sport a informa.
E club Blanco cu preto a confirma den un comunicado cu su director deportivo, Fabio Paratici ta wordo investiga pa Ministerio Publico di Perugia, pero a defende su dirigente y a sigura cu el a actua di manera corecto.
Zomer ultimo, Suarez tabata a punto di ficha pa Juventus despues di a dispidi di Barcelona pero pa e operacion mester tabata posibel, e Uruguayo mester prome obtene e ciudadania Italiano, ya cu e conhunto di Turin no a keda lluga pa hungadonan extracomunitario. Ta pa e motibo aki mes cu Suarez mester a pasa e examen di Italiano, loke e futbolista a haci cu exito na september den e Universidad pa Stranhero di Perugia.
E traspaso finalmente no a tuma luga y Suarez a caba den Atletico de Madrid, pero e historia di e Uruguayo cu Juventus no a caba eynan. E caso ta cu Ministerio Publico di Perugia a habri un investigacion di posibel fraude den examen, cual a cualifica di “farsa”, pasobra su datonan e aspirante ya a conoce cu anticipacion e respuesta di tur e preguntanan. Segun fiscal hefe Raffaele Cantone, e club Italiano “a tuma medida, incluso den e nivelnan institucional mas halto, pa acelera e concesion di ciudadania Italiano na Suarez.”
Manera cu medionan local a informa, varios dirigente di e Universidad di Perugia, a inclui e rector, a wordo suspendi pa ocho luna, como responsabelnan di e supuesto estafa.
