Dialuna Hof di Corte Superior ta dicta sentencia cu Jennifer Gonzalez ta culpabel di a provoca asesinato di Sergio Maduro. Apesar di esaki, Hof a baha e castigo.
SOLO DI PUEBLO por a compronde cu Hof a baha e 18 aña di prison na 15 aña di prison. Esaki door cu psychiater y psycologo ta mustra cu Jennifer no ta completo responsabel pa su actonan.
PG A EXIGI PA MANTENE 18 AÑA DI PRISON
Dia 22 October 2025, Hof di Corte Superior (Hof), a trata e apelacion di Jennifer contra su condena di 18 aña di prison. Durante tratamento di e caso, hasta e asesino Bryan Jimenez Mello, a wordo scucha como testigo.
Procurador General (PG) a bisa Hof, cu riba e anochi di 23 pa 24 December 2023, Sergio Maduro a wordo asesina na un forma hororoso. A pasa auto riba dje pa laga mustra cu ta un accidente a sosode. Pa solamente 2 mil florin Bryan Mello a mata Sergio Maduro. Door di declaracion di Bryan Mello a haya sa cu ta Jennifer a provoca e morto di Sergio Maduro, door di ofrece pago na Bryan Mello.
Na opinion di PG, huridicamente no ta necesario cu mester tin un plan pa asesinato, pa asina haya Jennifer culpabel. PG ta haya cu e hecho cu a ofrece pago pa mata, ta suficiente pa considera provoca asesinato. PG a mustra cu Patologo a constata cu tin marca di tire di auto na curpa di e victima. Bryan Mello a bisa cu Jennifer a duna un adelanto pa asina mata Sergio Maduro. Tin mensahenan entre Bryan y Jennifer despues cu Sergio a wordo asesina. A purba saca placa for di bancomatico cu e carchi di Sergio, despues cu el a wordo mata pero no a logra.
PG ta haya cu tin suficiente prueba cu ta Jennifer a provoca e asesinato di Sergio Maduro. Den Corte Bryan Mello a bisa cu Jennifer a ofrece placa pa mata Sergio Maduro. PG a mustra cu apesar di ta handicapped, Jennifer tin 10 aña ta trahando na Wendy’s. PG a tene cuenta cu raport di psychiater y psycologo cu Jennifer ta menos responsabel y pidi Hof pa confirma e sentencia di 18 aña di prison.
SENTENCIA HOF
Hof den su sentencia ta bisa cu abogado a bisa cu mester declara Jennifer liber pasobra no tin prueba cu el a provoca e asesinato di Sergio Maduro. Na opinion di abogado mr. D.Croes, Bryan Mello a duna otro declaracion den Corte Superior y cu Bryan Mello ta sufri di problema mental.
HOF NO TA KERE DECLARACION
Hof ta haya cu e declaracion di Bryan Mello duna den Corte Superior, esta cu el a mata Sergio den su rabia y no ta riba orden Jennifer, no confiabel. Hof no ta kere esaki pasobra ta awor numa Bryan Mello a declara esaki y no den su declaracionnan anterior. Hof ta haya cu e declaracionnan di Bryan Mello na Polis, ta duna suficiente prueba cu ta Jennifer a provoca e asesinato di Sergio Maduro.
JENNIFER CULPABEL
Hof ta haya cu no tin indicacion cu Jennifer no tabata capaz pa planea e asesinato. Na opinion di Hof, Jennifer a bisa diferente persona cu Sergio mester muri y cu e mester laga mustra manera un accidente. El a ofrece placa. Hof a mustra cu psychiater y psycologo ta mustra cu Jennifer ta mesnos responsabel pa su actonan.
BAHA E CASTIGO
Pa cu e castigo, Hof a mustra cu Jennifer a paga un otro un adelanto pa mata su pareha Sergio. Bryan Mello a choca Sergio mata y despues a pasa auto riba dje y lag’e benta banda di caminda. Hof ta mustra cu asesinato ta un di e delitonan mas grave. A kita bida di Sergio y a causa daño irreparable na e famia di Sergio. Hof a mustra cu den e carta entrega na Hof ta expresa esaki. Hof a condena Jennifer na 15 aña di prison, kitando e tempo cu ya e ta sera den KIA.
