Parlamento tabata e centro di atencion e siman aki na momento cu a debati riba e resultado di negosacion entre Aruba y Hulanda pa loke ta trata supervision financiero.
Un reunion cu fraccion di MEP a solicita, hunto cu fraccion di PPA, mas di 7 luna pasa, pa gobierno duna informacion tocante e negosacionnan cu Hulanda. E reunion a wordo yama despues di 5 luna y na e momento ey di parti di gobierno prome minister Eman a informa cu negosacionnan a termina y ya Hulanda a aproba e leynan nobo. A resulta pues cu sin negocia debidamente, gobierno di AVPFuturo a entrega autonomia financiero di nos pais na Reino Hulandes, sin informa Parlamento y sin consulta cu pueblo.
E falta di transparencia di parti di Gobierno ta wordo condena. Den historia di pais Aruba, nunca antes un gobierno a bay tras di lomba di Parlamento pa atende un tema asina crucial pa democracia di nos pais.
Pues e caracter di e reunion a cambia di “haya informacion tocante negosacion” pa “duna opinion tocante e resultado di negosacion”.
Riba peticion di fraccion di AVP e reunion a wordo posponi cu 2 luna, pa “fraccion di AVP por studia e ley”. Sinembargo ora e reunion a wordo yama bek despues di dos luna, supuestamente ainda fraccion di AVP no a logra studia, ni compronde e ley y no tabata tin opinion riba e ley. Hopi ta comenta con debil y mal prepara AVP ta. E forma con ta purba hustifica algo cu nan sa cu a cana e procedura equiboca, a causa critica di nan propio votadornan, principalmente pasobra nan ta sconde bou di saya di MEP constantemente.
Di otro banda, fraccion di MEP a haci un tremendo trabou. Lider di Fraccion a cuminsa cu pone e tono di e reunion, y e tono a sigui bira mas firme cu cada Parlamentario di MEP cu a hiba palabra. Cada un a elabora riba e aspectonan tecnico di e ley y principalmente por a splica e ciudadano cu tabata sigui e reunion kico e consecuencia di e leynan aki ta pa cada ciudadano. E impacto riba e hecho cu no ta gobierno di Aruba lo bay tin e ultimo palabra den finansas mas, e hecho cu costo di bida lo sigui aumenta, y cu hasta edad di pensioen di 65 aña ta na peliger si Hulanda sigui exigi pa aumenta esaki.
Por a nota e diferencia den conocemento y experiencia, pero principalmente den e pasion y amor pa Aruba, su autonomia y pa e ciudadano di nos pais. Locual AVP a neglisha completamente. Es mas, e fraccion di AVP tabata hopi zwak, bruha y perdi.
Den nomber di tur e votadornan di partido MEP, y e casi 10 mil firmante, nos ta felicita Fraccion di MEP. Den man di e Parlamentarionan di MEP, nos por confia futuro di nos pais y nos tin speransa cu e ley di Reino aki TAMBE lo wordo bari for di mesa.
