Lider di fraccion di PPA, Eduard Pieters, ta critica fuertemente e falta di claridad for di Hulanda tocante continuidad di e Landspakket di Aruba y otro islanan den Reino, despues cu Secretario di Estado Hulandes di e Relacionnan den Reino, no a logra duna Tweede Kamer un contesta concreto tocante kico lo pasa despues cu e periodo actual termina.
Pa Pieters, e situacion no ta cla. Conseho di Minister di Hulanda a mustra interes pa sigui den e trayecto aki. Aruba a expresa cu e kier sigui cu e proceso di reforma, mientras si ta inverti considerabel tempo, energia y esfuerso politico den otro trayectoria, esta Rijkswet HOFA.
“Pa un Rijkswet HOFA si nan tin tur tempo. Pero pa un instrumento di cooperacion, cu nos ta trahando riba dje hunto, no tin claridad tocante su continuidad?”
Tweede Kamer merece un contesta
Pieters a reacciona despues di un debate den Tweede Kamer tocante Relacionnan den Reino, caminda parlamentario Hulandes a haci pregunta tocante e futuro di e Landspakket.
Segun Pieters, e Secretario di Estado no a duna un contesta concreto. Pa e lider di fraccion di PPA, un mandatario cu ta responsabilisa su mes na Parlamento, mester por contesta pregunta relevante. Si e informacion no ta disponibel na e momento ey, e por indica cu e lo busca y regresa cu un contesta. Pero simplemente laga incertidumbre rond di un proceso, cu ta canando pa lunanan, no ta suficiente.
Aruba kier sigui cu reforma
Pieters a recorda cu e Landspakket ta basa riba cooperacion entre e paisnan dentro di Reino y cu Aruba a drenta den e trayectoria pa traha riba e reformanan.
E ta enfatisa un punto importante: reforma no mester ta interpreta como algo cu Hulanda unilateralmente ta dicta na Aruba.
Segun Pieters, tanto Gobierno anterior como Gobierno actual di Aruba tin responsabilidad pa determina cual reforma Aruba mes ta considera necesario pa su desaroyo.
“Esey no ta nifica cu Hulanda mester bin “lees het lesje voor” y bisa nos tur cos cu nos mester haci. Aruba mes mester determina, unda nos kier reforma.”
Precisamente p’esey, Pieters ta mira balor den un modelo di cooperacion, caminda e paisnan ta traha hunto, en bes di implementa un opcion, unda autoridad ta move unilateralmente.
Evaluacion positivo, pero futuro incierto
Segun Pieters, e trayectoria actual ta acercando su final y a haci un evaluacion di e cooperacion. El a señala cu, den caso di Aruba, e indicacionnan di e evaluacion tabata positivo y cu Aruba a expresa interes pa continua cu e Landspakket.
Despues di inversion di tempo, energia y placa, Pieters kier sa pakico no tin un direccion cla tocante kico ta sigui. P’esey e ta haci un yamada tambe na e miembronan di Tweede Kamer, pa para fuerte y exigi claridad di Gobierno Hulandes tocante futuro di e cooperacion cu Aruba.
Dos manera diferente di trata Aruba
Pa Pieters, aki ta sali un contraste politico importante. Na un banda tin e Landspakket: un instrumento cu ta basa riba cooperacion y unda Aruba por sigui traha riba reforma cu e mes ta considera necesario y carga su responsabilidad na un manera efectivo.
Na otro banda tin Rijkswet HOFA, caminda Pieters ta sostene cu e modelo di supervision proponi ta toca directamente nos autonomia y posicion constitucional di Aruba.
Y precisamente pa e ultimo trayectoria ey, si ta haya tur tempo y energia.
E contraste ta e problema.
Si Hulanda realmente ta interesa den reforma sostenibel na Aruba, Pieters ta considera cu e prioridad mester ta pa fortalece cooperacion cu ta funciona, no crea mas incertidumbre rond di dje. Pa PPA, Relacionnan den Reino mester ta basa riba respet mutuo, claridad y cooperacion entre e paisnan. “No por ta cu pa pone mas control riba Aruba tin urgencia, pero pa sigui cu un cooperacion cu por beneficia ambos pais, no tin ni un contesta cla,” Eduard Pieters a finalisa bisando.
