E acusado homber E.Q.O. a presenta den Corte pa scucha su sentencia di Hof di Corte Superior. El a wordo haya culpabel di intento di asesinato di tres hende.
SOLO DI PUEBLO por a compronde cu E.Q.O. a apela su sentencia di 9 aña di prison, caminda el a wordo haya culpabel di intento di asesinato di tres hende y posecion di arma di candela. Apesar cu psychiater y psycologo ta haya cu E.Q.O. ta menos responsabel pa su actonan, Hof ta haya cu E.Q.O. ta completo responsabel y ta culpabel di intento di asesinato di 3 hende y posecion di arma di candela.
TIRAMENTO BANDA MISA DI NOORD
Dia 22 October 2025, tratamento di e caso a tuma lugar caminda Procurador General (PG) a bisa Hof cu 5 Februari 2023 den oranan trempan di mainta, Polis a bay banda di misa Santa Ana na Noord, pa un accidente. Dos auto, un Mazda y un MG lo a dal. Polis a constata cu e auto MG tabatin masha hopi impacto di bala. Polis a bay hospital y a detene hendenan. PG a bisa cu investigacion a mustra cu tabatin tiramento di un auto riba e otro y a detene e trio di cual E.Q.O ta forma parti. Hues a condena E.Q.O. na 9 aña di prison y tambe e otro dos. Den e Mazda dos tabatin arma di candela cu a tira riba e MG. Polis a constata 8 impacto di bala riba MG y 2 den windshield. A haya 11 huls di bala riba caminda. Investigacion ta mustra cu e Mazda a sera e MG den cual e homber S.M. tabata sinta. Despues a tira for di e Mazda riba e MG. E autonan a dal contra muraya banda di Imelda Hof y E.Q.O. a keda seriamente herida caminda el a keda varios dia den coma.
PG a bisa Hof cu e ta haya cu e apelacion no ta funda y pa mantene e sentencia di Corte Den Promer Instancia, esta 9 aña di prison.
Durante tratamento di e caso den Corte Superior, Hof a mustra cu na Polis un di esnan den e Mazda a conta cu E.Q.O. tin problema cu e homber S.M., kende a tira mata Lalo Webb cu ta primo di E.Q.O. Tambe e acusado a bisa Polis cu e origen di e problema ta E.Q.O. y S.M. Hof a mustra cu 9 Maart 2015, Lalo kende tabata miembro di e gang di Madiki, a wordo tira mata den cabez.
HOF NO TA KERE TESTIGONAN
Un Hues di Corte di Husticia, a lesa e sentencia di Hof pa E.Q.O.
Hof a mustra cu e otro acusadonan a wordo scucha como testigo dilanti Hues Comisario. Nan tur a bisa cu no tabatin un plan di intento di asesinato. Hof a bisa cu e no ta kere e declaracionnan aki. Hof ta bay tras e declaracion di e acusadonan net despues di e incidente. Na Polis nan a papia di un plan. Hof ta haya cu E.Q.O. ta culpabel di e intento di asesinato di 3 persona.
A BAHA CASTIGO
Hof, pa cu e castigo a mustra cu E.Q.O. hunto cu otronan, a core banda di un auto cu tabatin 3 hende aden y a tira ariba e auto. Hof ta tuma na malo cu a tira riba e auto camindia tin mas hende cu esun cu nan kier a mata.
Hof ta haya cu mester manda un señal bon cla cu no ta tolera e tipo di comportacion aki. Tambe Hof a mustra cu a usa armanan di candela.
Na opinion di Hof, apesar di aviso di e raport di psychiater y psycologo, cu E.Q.O. ta menos responsabel pa su actonan, Hof ta haya E.Q.O. completo responsabel pa loke a sosode.
Hof a tene cuenta cu E.Q.O. a keda afecta na cabez door di e accidente.
Hof a condena E.Q.O. na 8 aña di prison, kitando e tempo cu e ta sera den KIA.
