Minister Geoffrey Wever ta anuncia cu recientemente Directie Financiën cu orguyo a lansa su website oficial: www.finance.gov.aw. Un plataforma digital cu ta representa un paso importante den e compromiso continuo di transparencia, comunicacion efectivo y servicio na e comunidad Arubano.
“Mi ta sumamente contento cu e paso importante aki, cu e website aki nos ta promove transparencia y nos ta eleva nos servicio na comunidad”, segun Minister Geoffrey Wever.
Un fuente central pa informacion
E website ta presenta un diseño moderno y funcional cu ta facilita acceso rapido na informacion esencial tocante e rol, tarea y servicionan cu Directie Financiën ta ofrece. A traves di e website, tanto ciudadano y empresa, como institucionnan gubernamental y internacional por haya informacion actualisa tocante maneho di finansas publico, proceso presupuestario, y demas aspecto relaciona cu e funcion financiero di nos pais.
Accesibilidad pa un y tur
Directie Financiën a enfoca pa crea un plataforma accesibel y facil pa usa, cu ta permiti tur bishitante haya informacion tocante finansas publico di manera claro y comprendibel. E website ta inclui publicacionnan financiero, un seccion di preguntanan frecuente y informacion di contacto, cu ta fortifica un comunicacion mas directo entre Directie Financiën y comunidad.
Compromiso cu modernisacion y bon servicio
E lansamento di e website ta parti di un esfuerso mas amplio pa modernisa e manera den cual gobierno ta comparti informacion y ta brinda servicio na e ciudadano. Directie Financiën ta compromete pa sigui usa tecnologia pa aumenta transparencia, eficiencia y confiansa den maneho di finansas publico di Aruba.
Disponibel pa tur bishitante
E website www.finance.gov.aw ta disponibel den tres idioma y ta sirbi como un punto central pa informacion oficial di Directie Financiën. Cu e paso aki, Directie Financiën ta reafirma su compromiso pa sigui fortifica un sistema di finansas publico responsabel y transparente na beneficio di comunidad henter. Minister Geoffrey Wever ta gradici y felicita full e departamento di Directie Financiën y especialmente director Sr. Derrick Werleman cu e paso importante aki.
