Botica di Servicio ta orguyoso di anuncia cu e di 8 edicion di Diabetes Run & Walk 2025 a tuma lugar cu exito e diadomingo pasa cu bon solo y un ambiente hopi alegre. E evento a ricibi 1.500 participante, incluyendo coredonan cu a biaha for di exterior pa participa y apoya e causa, haciendo esaki e edicion mas grandi y mas diverso te cu awo.
Coredonan di Aruba y exterior a uni forsa pa mustra apoyo y conscientisacion na e lucha contra diabetes. E causa aki ta hopi importante pa nos isla, ora cu prevalencia di diabetes na Aruba ta casi dos biaha mas halto cu promedio mundial. E ambuente durante e evento tabata yena cu energia, positivismo y orguyo comunal, mientras participantenan a completa e trayecto den solidaridad cu tur esnan afecta door di diabetes.
E evento di e aña aki a recauda AWG 17.500, cu lo wordo dona na Jump18 pa e di tres aña consecutivo. E fondo lo duna sosten na nan programa di cohort cu ta guia mucha cu obesidad of na riesgo pa diabetes. Bou direccion di Dr. Busari y su team, e programa ta ofrece workshop practico y sosten pa un estilo di bida saludabel y duradero pa mucha y famianan.
Botica di Servicio ta expresa un danki grandi na tur participante, boluntario, sponsor CMB, Punta Brabo Diagnostics, Subway, y nos partner di hopi aña Patrishi Sports Aruba, cu a duna sosten den timing y logistica durante e evento.
Nos ta spera pa ricibi tur hende atrobe otro aña pa un otro edicion inspirado di Diabetes Run & Walk.
Klik e link pa wak mas di nos tremendo evento aki: Diabetes Run 2025
