Como miembro di parlamento mi kier enfatisa mi preocupacion grandi respecto e manera irregular den cual Vice Presidente di Parlamento sra. Wever ta tratando cu reunionnan den Comision Central.
Dos reunion tras di otro cu no ta keda atendi na un manera serio y responsabel. Ta trata Landsverordening Instelling Ministeries (LIM) y Ontwerp-landsverordening tot wijziging van de Landsbegroting 2025
Fraccion di MEP a manda un carta formal pa Su Excelencia Gobernador sr. Boekhoudt cu imparcialmente mester salvaguardia integridad di nos democracia. Nos a splica paso pa paso con e vicevoorzitter, actuando como voorzitter suplente, a tuma decisionnan cu ta contra e Reglement van Orde di Parlamento. No solamente ta yama reunion riba man, no ta brinda parlamentarionan espacio pa duna opinion y comentario, pero tambe ta bati martiu na un manera autoritario proclamando un “blanco verslag” aunke no tur miembro presente tabata di acuerdo. Esaki ta contra di tur fatsoen y regla.
E procedimiento aki ta prohibi explicitamente bou di articulo 83 di e nos Reglement van Orde, solamente si NINGUN miembro tin obhecion e ora por desvia. Ta bon pa pueblo sa cu MEP a opone contra dicho intencion. Apesar di esaki toch sra. Wever a bati martiu y sera reunion.
Ora bo ta ciega pa poder y ta kere cu bo por trapa riba Constitucion y derechonan di un parlamentario, eventualmente realidad ta bati na bo porta. Bo por wel cu bo boca grandi, bisa cu “nos ta mayoria, nos ta manda”.
Pero awe e situashon a mustra claromente cu no por maneha na un manera dicatorial paso bo tin mayoria. E echo cu a dicidi pa yama un otro reunion pa trata e mesun topico ta prueba di esaki. Ni cuanto sra. Wever purba di hustifica, cu e la yama e reunion di nobo y toch a duna tempo, aunke no suficiente, ta bisa bo hopi caba. Realmente un berguensa. Mi ta termina bisando, den parlamento e ta nos obligacion pa sigui regla y no pa kibra nan!
