Aerolíneas Argentinas a anuncia extension di su operacionnan pa Aruba, for di januari te cu april di otro aña, cu vuelonan for di Buenos Aires y Córdoba, reflehando e demanda grandi registra pa e destinacion mas nobo di Aerolíneas Argentinas den Caribe.
E operacion extendi lo mantene e mesun skema di dianan y frecuencianan manera anuncia originalmente, esta tres buelo semanal cu ta conecta Buenos Aires, Aruba y Córdoba, cu vuelonan di regreso pa Buenos Aires, riba dialuna, diasabra y diadomingo. Tambe lo tin un vuelo semanal di ida y buelta entre Córdoba y Aruba, riba diahuebs. Ademas, na januari y februari lo opera un vuelo semanal pa y for di e ciudad Mendoza.
Cu e expansion aki, Aerolíneas Argentinas ta sigui fortalece su conectividad internacional pa e proximo lunanan y extende operacionnan riba rutanan di demanda halto mas leu di e temporada di zomer.
Miho calidad
E turista for di Argentina generalmente ta conoci pa gasta mas durante nan vakantie na Aruba. Nan ta keda mas largo y ta laga bon placa atras, na compras, na cuminda y bebida, hotel, etc. “E mercado di turistanan Argentinero a crece significantemente na Aruba e ultimo tempo y desde luna di augustus ultimo, nan ta domina e mercado Latino Americano, surpasando Colombia. Un di e motibonan principal pa bin Aruba, banda di nos beachnan cristalino, ta nos seguridad. Nos intencion ta pa sigui crece den e mercado aki den e aña nobo nos dilanti”, asina Minister di Turismo, Labor y Transporte, mr. Wendrick Cicilia, a enfatisa.
E bishita di Minister Cicilia na Bogota ta dunando resultado. Tabata prome biaha den 10 aña, cu’n Minister di Turismo, conhuntamente cu AAA y A.T.A, a reuni cu tur e partnernan clave cu ta representa e mercado Latino Americano. Un demostracion fuerte di e compromiso serio di Minister Wendrick Cicilia pa fortalece e lasonan di Aruba den henter e region.
E vision di Minister di Turismo ta pa sigui diversifica nos mercadonan turistico, garantisando cu Aruba ta keda resiliente, competitivo y conecta na e oportunidadnan nobo rond mundo.
Minister di Turismo, Aruba Tourism Authority y Aruba Airport Authority a traha conhuntamente, banda di Departamento di Aviacion Civil, pa por a logra atrae e aerolinea aki pa nos isla.
Aeropuerto di Aruba ta sigui crece
Pa Aruba Airport Authority NV, esaki ta di mas o menos 30 aerolinea cu ta bula pa nos destinacion. “E vuelo nobo aki directamente for di Argentina pa Aruba sin duda ta impulsa e conectividad entre Aruba y e region, specialmente cu e mercado mas importante di Latino America y ta fortalece e relacionnan bilateral pa cu tema di turismo pa ambos pais, pa cual Aruba ta masha satisfecho cu e plannan riba mesa actualmente”, asina Jo-Anne Arends, Business Development Executive na Aruba Airport Authority a bisa. Cu e destinacionnan nobo aki awo e Rubianonan tambe tin mas opcion pa bay pasa vakantie, cu vuelonan directo pa varios ciudad na Argentina.
A prolonga vuelo prome cu cuminsa mes!
Prome cu e vuelo inaugural na januari 2026, ya e aerolinea a anuncia cu ta prolonga e periodo di dos luna cu nan lo a bula te pa e prome cuater lunanan di otro aña. Esaki ta basa riba e demanda halto cu nan a constata pa e destinacion di Aruba. “Aerolíneas Argentinas a demostra un compromiso sosteni cu Aruba, door di mantene y te hasta amplia nan operacion, cu ta refleha caba resultadonan sobresaliente. E continuidad te april, no solamente ta subraya cu tin un demanda grandi, sino tambe ta indica cu pasaheronan ta aprecia e vision di un turismo sostenibel, di calidad halto y cu un impacto positivo pa ambos pais. Un bon conectividad no ta un detaye tecnico; e ta e curason mes di e desaroyo turistico y un herment clave pa acerca culturanan y fortalece economianan”, asina Ronella Croes, Chief Executive Officer di Aruba Tourism Authority a indica.
Tocante Aerolíneas Argentinas S.A.
Aerolíneas Argentinas S.A. (ARSA) ta carga e bandera di Argentina, dedica na e transporte comercial di pasahero y carga. Ta consider’e un di e companianan di aviacion di mas sigur na mundo y na aña 2018 Travelers’ Choice Awards a scog’e como e miho compania di aviacion den e henter e continente Americano pa su servicio abordo y un rendimento di 90% na tempo.
E ta opera vuelonan pa mas cu sesenta y seis destinacion domestico y internacional den Sur America, Caribe, Noord America y Europa. Anteriormente, Aerolíneas Argentinas tabata opera vuelonan pa Oceania, incluyendo un vuelo transpolar a traves di Antartica y pa Africa, specificamente Sur Africa.
Su operacionnan comercial principal ta basa na Aeropuerto Jorge Newbery (Aeroparque) na Buenos Aires y Aeropuerto Internacional Ministro Pistarini, situa den e provincia di Buenos Aires. E compania tambe ta maneha Aerolíneas Cargo y Jet Paq, e compania di servicio di rampa Aerohandling y e compania di servicio di biahe Optar.
A privatisa Aerolíneas Argentinas na aña 1990 y a regresa na control estatal na aña 2008. Desde aña 2009, el a modernisa su flota, a adkiri simuladonan di vuelo y a crea rutanan internacional, domestico y regional nobo. E ta un miembro di e aliansa SkyTeam for di aña 2012, siendo e prome y unico partner Sur Americano. Aerolíneas Cargo ta un miembro di SkyTeam Cargo.
