Minister di Finansa, Asunto Economico y Sector Primario. mr. Geoffrey Wever hunto cu “United Nations Economic Commission for Latin America and the Caribbean” (UN-ECLAC), a presenta e resultado di e estudio haci door di UN-ECLAC riba e oportunidadnan, riesgonan y obstaculonan di e sector di FinTech pa Aruba y evaluacion di e impacto di “Blockchain Technology” y “Crypto Currency” na Parlamento di Aruba.
Na 2024 Minister Geoffrey Wever a cera un partnership strategico cu UN-ECLAC tocante desaroyo economico y mas specifico pa explora oportunidadnan di e mundo di FinTech, tecnologia di block chain y cryptocurrency. Hulanda, por medio di Landspakket, tambe ta un partner strategico den desaroyo di e sector di FinTech pa Aruba.
E sector FinTech ta inclui innovacion tecnologico den servicionan financiero. Esaki ta inclui avancenan di online banking, sistemanan di haci pago online, di maneha inversionnan y mas. E tecnologia principal den FinTech ta blockchain y cryptocurrency.
Desaroya e sector di FinTech tin su beneficionani pa e economia di Aruba, manera:
1. Crecemento economico: Adoptando e innovacionnan di FinTech por boost e sector di servicio financiero di Aruba, creando oportunidad di negoshi nobo y atrae inversionnan nobo.
2. Mas eficiencia: FinTech ta streamline transaccionnan financiero, reduci costonan, y mehora eficiencia entre empresa y consumidor
3. Inclusion Financiero: E innovacion di FinTech por ofrece mas accesibilidad di servicionan finaciero na esnan menos afortuna, promocionando inclusividad y iqualdad economico.
4. Competitivo globalmente: Adoptacion di e tecnologia emergente aki lo posiciona Aruba como un economia cu ta pensa pa futuro y atrayendo negoshinan internacional.
5. Maneho di risico: Investigacion profundo lo yuda Aruba pa identifica y mitiga risiconan asocia cu tecnologia di FinTech, sigurando un ambiente financiero stabiel y sigur.
Na comienso di 2025 UN-ECLAC a conduci e studio y a reuni cu diferente partner manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT y diferente persona clave den sector di FinTech. E resultadonan di e estudio a ser presenta tambe na stakolders na augustus 2025. E resultado di e estudio ta available riba website di UN-ECLAC. Ta trata un total di cuater rapport. E rapportnan ta indica cuanan ta e condicionnan cu ta necesario pa logra un sector di FinTech cu ta safe, inclusivo y competitivo.
E estudio ta e base riba cual lo bay desaroya y implementa maneho pa pusha e desaroyo di e sector di FinTech y diversificacion concreto di Aruba su economia. E next step ta desaroya e strategia di implementacion di FinTech. Esaki lo tuma lugar den cuadro di Landspakket.
“Mi ta contento di wak e proceso di diversificacion real di nos economia ta canando. FinTech ta cosnan actual di e mundo moderno. E estudio a finalisa y a ser presenta na stakeholders y awor tambe na Parlamento di Aruba. Esaki ta e base pa nos sigui awor cu e desaroyo di e plan strategico pa implementa e sector di FinTech na Aruba,” Minister Wever a declara.
