Den cuadro di Dia di Santa Cecilia, patrona di tur musico, Departamento di Cultura Aruba (DCA) bao di auspicio di Ministerio di Cultura, a organisa “Un Anochi di Serenata” riba Plenchi Hubert “Lio” Booi di Universidad di Aruba. E anochi a habri cu canto di himno di Aruba presenta pa Michelangelo Joel “Angelo” Koolman. A sigui cu palabranan di Director di DCA drs. Siegfried Dumfries kende a enfatisa cu musica ta un idioma universal cu ta uni generacionnan, ta conta nos historia y ta fortifica nos identidad cultural. El a expresa danki na tur musico – profesional y aficciona – cu nan dedicacion, talento y entrega pa mantene nos tradicion bibo. Director di DCA: “Boso trabou ta un patrimonio bibo cu ta inspira, educa y eleva nos comunidad.” DCA ta compromete pa sigui crea espacio, apoyo y oportunidad pa talento actual y futuro sigui florece.
E programa di anochi a inclui presentacion y reconocemento na nos grupo y musiconan cu un gran legado cultural, entre nan:
• Trio Los Arubeños: Reynaldo “Rey” Lampe, Fortunato “Catey” Werleman y Mario Croes;
• Trio Huasteca: Jose Enrique Escalona, Maximiliaan “Max” Hassell y un reconocemento postumo na Alex Edward “Etty” Toppenberg;
• Trio Oro: Reynaldo “Ronny” Kock, Ambrosio “Chito” De Cuba y Vicente “Vito” Koolman.
DCA a honra tambe baluartenan cu un aporte duradero na preservacion di nos musica di serenata: Nerio Italo “Taly” Wever, Leon Ricardo Ras, Mario Benigno Middendorp, Ivan Eugene Jansen y Michelangelo Joel “Angelo” Koolman. Sr. Ivan Jansen no por tabata presente y lo ricibi su reconocemento na un otro ocasion.
E evento a sigui cu un presentacion excepcional di Michelangelo Joel “Angelo” Koolman ariba guitarra y cantando, hunto cu Omar Kock riba fiyo y Enrique Mora riba drum. E evento a clausura cu un presentacion vibrante di Serghio Jansen Trio, forma pa Serghio Jansen riba gitarra, Pierre Koolman ariba drum y Roy Croes ariba baho, celebrando cu talentonan hoben y asina promove continuidad di nos patrimonio musical.
Departamento di Cultura Aruba ta expresa su gratitud na tur musico, famia y invitado pa un anochi pleno di tradicion, reconocimento y orguyo cultural.
