Diahuebs mainta, Prome Minister mr. Mike Eman, acompaña pa Minister di Turismo mr. Wendrick Cicilia y e ekipo di Accion di Bario, a drenta e cayanan di Pos Chikito na altura di Betonicastraat. Hunto cu varios ploeg di limpiesa, Serlimar, GKMB, Bureau City inspector y Polis di Bario, a pasa na cada cas pa scucha e preocupacionnan di e habitantenan di e casnan social na Pos Chikito Zuid.
Ademas e ploegnan a duna un man na varios habitante pa deshaci di artefactonan grandi manera stoof bieuw, frigidair, corchon y cashinan bieuw. E personal di GKMB a pasa controla pa criadero di sangura den cura di cas y unda tabatin mester, a percura pa tira pesticida pa mata e criaderonan.
Pos Chikito Zuid su casnan tabata relativamente limpi, cura bon manteni y por sirbi como ehempel pa otro barionan. Minister Cicilia cu ta biba net dos caya panort di e casnan social, a keda bon ricibi pa su bario y a haya elogio pa e bunita iniciativa di Accion di Bario.
Merdia, e piscadonan di Rancho Clememte na Balashi a invita Prome Minister, hunto cu Minister Cicilia y e ekipo di Accion di Bario, pa dal un plato di pisca cu funchi fresco prepara.
Cada Accion di Bario ta duna e oportunidad pa e habitantenan por comparti nan preocupacionnan y deseonan cu Prome Minister Eman, cu hunto cu trahadonan social, ta percura pa acumula e informacion aki pa gobierno por crea maneho na bienestar di comunidad. Ademas Accion di Bario ta duna esnan den mas necesidad un man pa tene nan cura y rond di cas limpi pa por biba un bida mas digno.
