E prome periodo di un categoria nobo di e Areglo di subsidio pa Iniciativanan Social pasado di sclavitud Transatlantico pa e area Caribense di Reino ta habri awe. Fundacion- y asosiacionnan por haci un peticion pa subsidio den categoria 2 pa iniciativanan social chikito.
Bou di categoria 2 ta cay: diferente proyecto relaciona cu pasado di sclavitud, organisamento di encuentro- of eventonan cu ta contribui na procesamento di e pasado di sclavitud, proyectonan pa educacion y expresion artistico, incluyendo exposicion y presentacion. E proyectonan mester ta na beneficio di descendientenan di esnan sclavisa (comunidad).
Montante di e subsidio
E montante di e subsidio pa cada peticion pa categoria 2 ta minimo USD 10.000 y maximo USD 25.000. En total tin dos periodo pa categoria 2 den cua organisacionnan por haci un peticion. E prome periodo ta habri di 1 di december 2025 09.00 or AM CET te 12 di januari 2026 5.00 or PM CET. E di dos periodo ta habri comienso di 2028.
Tocante e areglo di subsidio
E areglo di subsidio ta un di e accionnan relaciona cu e disculpanan pa e pasado di sclavitud Hulandes cu minister presidente a pidi riba 19 di december 2022. Pa e areglo di subsidio a pone pa e area Caribense un presupuesto di mas di €29.3 miyon na disposicion.
En total tin ocho (8) tanda di peticion pa cuater diferente subsidio, reparti riba tres (3) aña, den cua organisacionnan por pidi subsidio pa proyectonan cu ta contribui na conscientisacion, reconocemento y conmemoracion y miho comprendemento di e influencia di pasado di sclavitud y su procesamento.
Mas informacion
Pa e parti Caribense di Reino tin un website special, Legacy to Future Funds1. Riba e website aki tin informacion tocante e areglo di subsidio y un referencia pa e website di Uitvoering Van Beleid (UVB) di Ministerio di Asuntonan Social y Empleo, cu ta ehecuta e areglo2. Por entrega un peticion pa subsidio via e portada di subsidio di UVB. Informacion tocante e areglo y tocante e proceso di registracion den e portada di peticion, ta disponibel na Papiamentu, Papiamento, Ingles y Hulandes.
1 Home – Legacy to Future Funds
2 Areglo di subsidio Iniciativanan Social Pasado di Sclavitud Transatlantico pa e parti Caribense di Reino | Subsidio y areglo | Uitvoering Van Beleid
