Tur hende cu kier logra algo den bida, mester perservera, pa bo bira un deportista profesional bo mester train tur dia, pa bo bira un bon dokter, bo mester studia, pa bo predica bo mester studia e palabra di Dios. Tur locual cu ta bon ta exigi perserverancia.
Si un hende ta perservera den maldad y inmoralidad, nos tin cu compronde cu un persona asina ey ta den gara di diabel, y den cas di scuridad.
Palabra di Dios ta bisa cu e esun cu perservera te na fin esey lo drenta, esaki ta pa convense bon cu e bida Cristian no ta un bida di flohera, tampoco un bida facil, pero ta un bida cu mester keda comunica cu Dios constantemente.
Haci bon na tur hende, hasta na esnan cu no ta gusta bo, pasobra ora nos haci bon, nos ta demostra cu nos ta disipel di Hesus Cristo.
Hebreonan 10:36 ta bisa: pa cumpli cu boluntad di Dios, y hanja locual E ta priminti boso mester perservera.
Cobardia y miedo no ta bini di Dios, serca Dios no ta existi e spirito di cobardia, pero un Spirito di forsa y poder y un mente sano.
Pica ta haci hende cobarde, y nan ta keda kere y ganja nan mes cu no tin mas oportunidad pa nan, pero nos tin un bon noticia: Si nos confesa nos pica Dios ta fiel y husto di pordona nos , nos picanan y libra nos di tur inhusticia.
Laga e speransa cu boso tin haci boso contento,perservera den tempo di tribulacion haci oracion constantamente. ( Romanon 12;12).
Perserverancia ta haci nos hende, cu un karakter aproba pa Dios y esey na su turno ta yena nos cu speransa.( Romanonan 5;4).
Esnan cu ta sigi perservera den loke ta bon,y ta busca gloria honor y bida eterna cu no ta caba nunca.
(Romanonan 2:7)
Ora mayornan ta perservera pa haci bon. di guia nan yuinan den caminda di Cristo Hesus , nan lo mira e poder di Dios , manifesta den nan bida.
Tur hende cu perservera pa haci bon lo ricibi bondad di Dios.
Tur hoben cu perservera den haci bon , lo ta hobennan exitoso den nan bida, y hacimento di bon ta bini di Dios, pesey tur hoben mester di Cristo Hesus den nan bida.
Perserverancia ta forma karakter di hende, ta haci hende integro, hende di respet, hende cu por tuma liderazgo, pasobra nan a pasa den prueba y a crece.
Laga nos no cansa di haci bon, sigi perservera, y nos lo cosecha locual Senjor tin pa nos.pasobra Senjor tin cosnan grandi pa esnan cu ta perservera.
Ta solamente cu bondad nos por vence maldad, pasobra asina nos ta demostra cu negativismo no por domina, cu decencia nos ta vence inmoralidad, cu positivismo nos ta logra, aunke tempo por ta trabahoso, y hende por ta rechasa palabra di Dios, toch nos mester sigi perservera, pasobra asina nos lo mira e cara di Dios.
Locual e enemigo ta planea pa malo Senjor lo cambie pa bon, Pasobra bondad ta bini di Dios, y di Dios solamente, pasobra tur don y cosnan bon ta bini di nos Tata cu ta den cielo.
E amor y bondad di Dios ta instrui nos riba e bon caminda , pa nos haci bon den tur momento, y bon den tur circumstancia cu nos por hanja nos mes aden.
Nos tur ta yama pa haci bon obra cual Dios a forma nos den dje for di principio di mundo.
Laga bondad reina den tur locual cu nos ta haci, tur dia.
Sinceramente, Pastor Marcel Balootje
