Minister Gerlien Croes a bisa cu el a paga algun shen florin di su placa priva – pa algo cu bal algun mil florin – y cu pa e motibo ey no tin obligacion di duna mas splicacion ni prueba. E pensamento ey ta completamente fout!
“Mi mes a paga”, no ta suficiente!
Den nos sistema parlamentario, responsabilidad ministerial no ta depende di ken a paga. Loke ta esencial ta cu aki nos ta papia di un biahe oficial den funcion, realisa cu un medio di transporte especial y caro. Bo no por compare cu bay supermercado, manera e minister kier pa Parlamento kere. Esaki ta crea automaticamente pregunta riba integridad, independencia y transparencia. Un simple declaracion cu “mi mes a paga” por lo tanto no ta suficiente.
Codigo di Conducta pa Ministers
Sin claridad riba na KEN a paga, CUANTO a paga y KI DIA a paga, e ta stroba Parlamento di evalua si e pago a wordo haci conforme balor di mercado, of si tin indicacion di un regalo of beneficio. Pasobra e codigo di conducta ministerial ta duna un interpretacion amplio na e palabra “regalo”, un regalo ta tambe ora bo paga 100 florin pa algo cu bal 1000 florin. Den e caso ey e diferencia, 900 florin ta wordo considera como regalo. Esey nan ta principionan huridico basico.
Minister creando mas desconfiansa
E minister sinembargo a nenga di duna cuenta y a crea aun mas desconfiansa cu su actitud di hasi mofa di e palamentarionan cu ta cuestione. “E informacion aki Parlamento no ta pidi pa nos interes personal, pasobra personalmente mi no ta interesa mes den con e minister aki ta hiba su bida, pero ta mi deber ta controla con e ta haci su trabou. Ademas, nos ta para fuerte den esaki pasobra pueblo ta pidi claridad, y pueblo tin derecho di haya claridad, y especialmente hobennan cu a deposita nan confiansa den e politico Gerlien Croes, ta hopi decepciona” lider di MEP Evelyn Wever-Croes a duna di conoce den Parlamento.
Honestidad y Transparencia e keda Gerlien grandi
E biahe a tuma lugar 4 siman pasa. Nos tin 4 siman ta busca claridad. Pueblo tin 4 siman ta exigi prueba, pero e minister a nenga. Su tempo caba y pesey Fraccion di MEP a entrega un mocion di desconfiansa contra e Minister. Pasobra, si pa algo interno, local, e minister ta gaña, ta con nos por kere loke e bisa nos awe, of mayan? Con pueblo por kere den futuro cu e lo tene su mes na regla y palabracionnan den nan propio acuerdo di gobernacion?
Awor ta na e mayoria den Parlamento pa dicidi: ta acepta cu e minister por sigui traha manera nada un pasa, of ta manda e señal corecto cu loke e minister aki a haci, no ta aceptabel?
