Despues di varios sesion largo y intensivo e siman aki den parlamento, Fraccion di AVP ta mira bek riba un periodo importante di trabou parlamentario, unda a trata y maneha e ley pa defini e structura di Gabinete di Ministerionan, e Presupuesto Supletorio, y tambe Presupuesto Nacional pa aña 2026. E sesionnan aki a exigi compromiso, resistencia y responsabilidad, pero mas cu tur cos, un enfoke cla riba loke ta importante: bienestar di nos pueblo.
Fraccion di AVP kier destaca cu un di e puntonan mas significativo den e debatenan aki ta e decision pa otorga un aumento di 200 florin na nos pensionadonan, sin inkomenstoets. Esaki ta un paso concreto y historico pa reconoce e dignidad di nos adultonan mayor, cu despues di hopi aña di warda, finalmente ta mira un refuerzo real di nan poder di compra. Ora un gobierno di berdad ta para banda di su pueblo, esey ta bira visibel den decisionnan concreto y accionnan cla.
Den e mesun liña, AVP a destaca varios ehempel reciente cu ta confirma cu e gobierno actual ta reacciona na necesidadnan real di comunidad. Entre nan, e restauracion di salario pa nos maestronan, reconociendo nan rol fundamental den formacion di nos hoben y futuro; e medidanan social introduci pa duna alivio na conciudadanonan cu ta pasa dificultad economico; y e reaccion rapido riba e demanda di pensionadonan pa mehoracion di nan situacion financiero.
Durante e sesionnan, Fraccion di AVP tambe a mustra liderazgo door di presenta tres mocion cu ta enfoca riba prioridadnan social y estructural pa Aruba. Esakinan ta: e propuestanan laboral entre otro pa reduci e siman laboral di 45 ora pa 40 ora, cu como meta pa mehora e balansa entre trabou y bida; e mocion pa revitalisacion di San Nicolas, pa impulsa desaroyo economico y social den e region; y e mocion pa reforsa siguridad den trafico, un tema cu ta toca bida diario di hopi ciudadano.
Ademas, Fraccion di AVP kier resalta cu durante tur e sesionnan largo y intensivo, nan a mantene un decorum respetuoso y profesional. AVP a scoge pa concentra riba argumento di contenido, dialogo serio y servicio publico, manteniendo como guia e responsabilidad cu nan tin pa e pueblo di Aruba, cu a duna nan e mandato democratico pa sirbi y representa nan interes.
Fraccion di AVP ta consciente cu e debate y decisionnan no semper ta facil, pero ta convenci cu e caminda cu ta traha riba dje awe ta un caminda di responsabilidad y servicio publico. Nos ta comprometi pa sigui defende interes di pueblo Arubiano, vigilando cu cada decision, cada ley y cada florin den presupuesto ta contribui na un Aruba mas fuerte, mas social y mas husto pa tur.
