Parlamentario di AVP y presidente di Comision di Husticia, John Hart, ta enfatisa cu salud mental y adiccion ta exigi un acercamento serio y un esfuerso comparti. E bienestar di personanan afecta, nan famianan y comunidad mester ta central, sin laga diferencia politico stroba e buskeda di solucionnan.
Hart a inicia e aña parlamentario nobo invitando sindicato Sindicato di Polis Aruba (SPA) na Parlamento di Aruba pa un reunion cu Comision di Husticia. Durante e encuentro, e comision a scucha e preocupacionnan y retonan cu Cuerpo Policial Aruba (KPA) ta enfrenta den su trabou diario.
Un di e temanan importante cu a surgi durante e dialogo constructivo ta e problematica di salud mental y adiccion. E comision lo duna e tema aki atencion inmediato, teniendo cuenta cu su impacto riba e personanan afecta, e comunidad y e instancianan cu ta atende e situacionnan aki.
Entre e retonan principal tin e crisis di personanan cu problema di adiccion cu ta biba of cana riba caya, e limitacionnan legal pa impone rehabilitacion y e necesidad di un cooperacion integral entre ministerionan y instancianan involucra.
Pa Hart, e situacion ta demostra cu polis no por carga e responsabilidad su so. Husticia, Salud Publico y Asuntonan Social mester traha hunto cu e instancianan specialisa pa conecta prevencion, tratamento, rehabilitacion y acompañamento cu e necesidadnan real di e personanan afecta.
Como resultado di e reunion cu SPA, Comision di Husticia a acorda pasonan concreto pa invita Fundacion Respaldo na Parlamento di Aruba. E reunion lo ofrece oportunidad pa scucha su perspectiva profesional, profundisa den e retonan y haya claridad tocante e obstaculonan y posibilidadnan pa mehora e atencion.
E limitacionnan legal relaciona cu rehabilitacion obliga tambe mester haya atencion den e dialogo. E buskeda di solucionnan mester tene cuenta cu e marco legal, derechonan di e persona y e necesidad di cuido, alabes cu e preocupacionnan di famia y comunidad.
Hart ta enfatisa cu e trabou di e comision cu e ta dirigi mester conduci na pasonan concreto. Salud mental no por bira un tema di confrontacion politico mientras hende ta sigui sufri y e servicionan involucra ta enfrenta e consecuencianan.
“E responsabilidad ta pa uni esfuerso, scucha e profesionalnan y traha hunto riba solucionnan cu por duna e personanan afecta e cuido y sosten cu nan tin mester,” asina Parlamentario Hart a indica.
