Diahuebs Corte di Husticia a trata e caso penal cu Ministerio Publico a cuminsa contra e dos hombernan Venezolano J.M. y E.Q. Ta asina cu nan a wordo deporta y ta abogado mr. Illes a presenta pa e caso.
SOLO DI PUEBLO por a compronde cu 5 kilo di marihuana y 1 kilo di cocaina a keda confisca. Fiscal a exigi 3 aña y 6 luna di prison pero Hues a baha esaki na 2 aña di prison.
BENDEMENTO DI DROGA
Fiscal a bisa Hues cu e duo J.M. y E.Q. ta wordo acusa di venta di cocaina y marihuana entre 2 April 2025 y 22 April 2025. Tambe ta acusa nan di a importa droga.
Hues a bisa cu segun e rapport di Polis, a haya informacion di bendemento di droga y a bay haci investigacion na e cas unda J.M. y E.Q. tabata keda. A haya 5 kilo di marihuana y casi 1 kilo di cocaina. A haya un schrift cu anotacionnan di bendemento. Ta asina cu J.M. y E.Q. a admiti na Polis di tabata bende droga pero pa un periodo cortico.
FISCAL
Fiscal a bisa Hues cu e ta haya legal proba cu J.M. y E.Q. tabata bende droga y posecion di marihuana y cocaina. Na opinion di Fiscal, for den e schrift cu anotacionnan por conclui cu ta cantidad grandi di droga J.M. y E.Q. a bende. Fiscal a bisa cu ta casi 20 kilo di marihuana y mitar kilo di cocaina, e duo a bende.
Fiscal a bisa Hues cu pa cu e castigo, e no ta kere cu mester mira e periodo sino e cantidad di droga cu a bende. Fiscal a bisa cu e ta sospecha cu e duo a importa droga pero no por prueba esaki. Fiscal a pidi Hues pa declara nan liber pa importacion di droga.
Fiscal a exigi 40 luna ( 3 aña y 6 luna ) di prison pa J.M. y E.Q. Fiscal a sigui bisa cu e droganan mester wordo destrui. E placanan confisca, 600 florin y 242 dollar mester keda confisca.
SENTENCIA
Hues a bisa cu e ta haya legal proba cu J.M. y E.Q. a bende marihuana y cocaina. Hues a bisa cu Polis a haya 5 kilo di marihuana y casi 1 kilo di cocaina. Hues a baha e castigo exigi pa Fiscal. Hues a condena J.M. y E.Q. na 2 aña di prison, e droganan ta wordo destrui y tur cos ta keda confisca.
