E conocido psicologo Sueco, psicoterapista cognitivo y autor Eva Rusz ta lansa su ultimo buki, ‘Dare to Change Your Life’ e diaranson aki 14 di januari na biblioteca na Oranjestad, durante apertura di e exposicion ‘Black and White’.
E storia captivante aki ta inspira pa su experencianan personal y profesional riba e isla di Aruba. E evento lo celebra e buki inspira pa e trayectorio personal y profesional di Eva riba e isla y su experencianan di abrasa cambio den un mundo multicultural.
Loke a cuminsa como un simpel biahe di skirbimento pa caba su di dos buki tocante relacion, “Are You Married to a Psychopath?”, pronto a bira un aventura cu a cambia su bida. Eva a namora di Aruba, su bunitesa, hende y cultura, y a bolbe aña tras aña pa skirbi y reconecta. Eventualmente, el a traha un cas, a habri su practica y a bira un psicologo di confiansa den comunidad.
Pero manera Eva a descubri, bishita un isla y traha un bida riba dje ta dos cos hopi diferente. Bou di e superficie di e “One Happy Island”, el a topa cu desafionan cu nunca e por a imagina, for di luchanan di inmigracion cu a lag’e ilegal dos biaha, te na momentonan di corupcion, traicion y hasta peliger. Toch, den cada prueba, el a haya compassion y proposito. Rescatando cacho di caya, descubriendo e bida salvahe unico di Aruba y abrasando e spirito caluroso y multicultural di e isla.
Aunke ‘Dare to Change Your Life’ ta basa riba experencianan real, e ta destina pa entretenimento y inspiracion personal, no como un documental factual. E buki ta ofrece lesadornan un exploracion yeno di bida tocante descubrimento propio, curashi y transformacion. Skirbi na un manera inteligente y yen di conocemento, e ta encurasha lesadornan pa acepta cambio y wak bida for di perspectivanan nobo.
E evento di lansamento ta inclui un introduccion pa e autor y firmamento di buki. Eva tambe a comparti pensamento tocante e proceso di skirbi y e temanan central di cambio, resiliencia y crecemento personal explora den e publicacion.
‘Dare to Change Your Life’ ta disponibel awor na Plaza Bookshop y De Wit Van Dorp.
Tocante e Autor Eva Rusz ta un psicologo Sueco, psicoterapista cognitivo y autor “bestselling” cu mas di dos decada di experencia. Su trabou ta enfoca riba yuda hende compronde relacion, salud mental y crecemento personal. E ta dividi su tempo entre Suecia y Aruba, unda e ta sigui skirbi, practica y inspira otronan pa abrasa cambio positivo.
