Fraccion di AVP den Parlamento di Aruba a cuminsa e aña nobo y e siman aki cu un enfoke cla riba e asuntonan mas actual y urgente cu ta biba den nos comunidad. Despues di reces parlamentario, e fraccion ta continua cu su rol activo y proactivo di reuni informacion, scucha pueblo y traha hunto cu diferente stakeholder pa busca solucionnan duradero pa Aruba.
“Parlamento ta pa sirbi pueblo, y esaki ta exactamente e filosofia cu ta guia nos trabou den 2026 tambe,” asina lider di fraccion, Jennifer Arends-Reyes a indica. Por ehempel, colega John Hart a yama minister di Husticia pa haci pregunta di control y siguridad den trafico, un tema cu ta causa preocupacion grandi den nos sociedad.
Ademas, Fraccion AVP a nota cu desde 1 di januari tin varios iniciativa di incentivo fiscal cu ta toca diferente sector di nos economia. P’esey mes, a pidi reunion cu minister di Finansas y Economia pa pasa door di e cuater nota di ley, esta Startersregeling, maneho nobo di Freezone, expatregeling, y e incentivonan pa revitalisacion di centro di San Nicolas y Oranjestad. Tur esaki tin como meta stimula crecemento economico, crea oportunidad y duna mas sostenibilidad na nos comunidad.
Un otro punto importante cu Fraccion AVP a pone riba agenda ta e uzo di klapchi. Basa riba señalnan di pueblo, ta puntra si por establece un dialogo cu importadornan, pa realiza un estudio riba impacto di klapchi. Den esaki ta tuma na cuenta e efecto cu tin pa naturaleza, bienestar di animalnan, y siguridad y salud di mucha chikito y grandinan. E enfoke principal ta riba nivel di decibel, pero tambe riba e posibilidad pa introduci mas klapchi cu ta menos duro, pero igualmente bunita y festivo.
Di e manera aki, Fraccion AVP ta sigui cu su trabounan durante e siman aki y padilanti, cu un compromiso firme pa representa e interes di pueblo Arubano, traha hunto cu stakeholdernan, y busca solucionnan practico y realista pa e desafio cu Aruba ta enfrenta awe.
