Den e dianan nos dilanti, y mi ta premira 2026 completo, oposicion di MEP lo sigui cu nan storia conoci: cu nan gobierno tempo cu nan tabata na mando tabatin e intencion pa fortalece poder di compra y cu ta danki na nan maneho e gobierno actual por duna bek. E echo ta cla y no ta discutibel: si di berdad gobierno anterior tabatin e intencion pa duna bek na e pensionadonan, dicon esaki no a refleha bek den e presupuesto 2025 cu gobierno anterior mes a propone?
Pa presupuesto 2026, un bes mas oposicion di MEP y PPA a mustra na ki banda nan ta para. Cu e implementacion di e aumento den AOV combina cu e reparatietoeslag, e total di pensioen pa pensionadonan ta subi di manera significativo entre januari 2025 y januari 2026. E aumento ta nifica concretamente cu pensioen pa soltero a subi cu AWG 500 pa luna, pensioen pa pareha a subi cu AWG 900 pa luna y pensioen pa pareha parti a subi cu AWG 485 pa luna. Pa cu esaki, MEP y PPA a vota contra.
E mes partido cu awe ta papia di nan bon intencion y cu ta nan a percura pa e surplus, a vota contra e presupuesto 2026 cu ta duna bek na nos pensionadonan. Ademas mester remarca tambe cu surplus no ta algo pa bo sinta broma cu ne, paso ta danki na medidanan impone riba pueblo cu awe por papia di surplus.
Parlamentario Hart a bisa durante su discurso den un reunion publico: “bon intencion no ta suficiente, bo mester ehecucion. Na momento cu gobierno AVP-Futuro a aloca fondo pa bolbe aumenta e reparatietoeslag den 2026 cu 250 florin, oposicion completo a bolbe vota contra. Esaki ta muestra cu oposicion no tin curason pa nos pensionadonan.”
Ta precisamente e tipo di politica sin vision aki, a forsa pueblo, y particularmente esunnan mas vulnerabel, pa confronta un dilema inhumano di desesperacion na momento cu nan mester scoge pa sea paga pa nan remedi of pa nan cuminda resto di luna te ora nan bolbe cobra.
Cu e aumento den AOV y reparatietoeslag den menos di un aña cu 500 florin pa pensionado soltero y 900 florin pa pareha ta trahando na un mehoracion di poder di compra pa duna nos grandinan mas siguridad, mas dignidad, mas paz y trankilidad. Esaki no ta un gesto simbolico, esaki ta un acto di husticia, un reparacion moral pa daño causa. Esaki ta un gobernacion cu curason, determina, y cu e pueblo como punto di salida pa cada decision”, asina parlamentario John Hart a indica.
Ademas, e cortamento sin piedad di 60 miyon florin cu e gobierno anterior a impone riba salud di e aseguradonan di AZV, ta keda graba den memoria di pueblo. E medida aki a inclui recorte den salario di e profesionalnan di salud, y a pone hopi remedi for di e lista positivo cu AZV no ta cubri.
Echo ta cu gobierno AVP-FUTURO, pa medio di un nota di cambio den 2025, a trece e prome cambio real di direccion pa duna alivio bek na pensionadonan y den 2026 a bolbe aumenta esaki. Laga nos no lubida cu e gobierno demisionario di MEP/RAIZ, net prome cu pito final a rebaha e loonbelasting pa e clase trahador cu e unico intencion di stroba e gobierno nobo di duna bek na pensionadonan.
Gobierno AVP-FUTURO, den su autoridad por a draai e decision aki bek, pero gobierno AVP-FUTURO a scoge te hasta pa ancr’e den e presupuesto. No obstante tur e trampa di oposicion pa purba stroba e gobierno nobo pa duna bek na nos pensionadonan, awe den e luna di januari 2026, nos pensionadonan por ta contento cu un aumento substancial. Nos no ta unda nos mester ta ainda, pero nos ta mas leu di unda nos tabata ta, asina e parlamentario di AVP a finalisa bisando.
