Durante e rueda di prensa di dialuna mainta, parlamentario Eduard Pieters a dedica un parti esencial di su mensahe na e mocion presenta den Parlamento tocante Violencia Relacional. Pueblo mes por mira e resultado di e votacion y Pieters ta kere cu ta necesario pa comparti loke e profesionalnan cu ta traha tur dia cu e sobrevivientenan mes a expresa: nan no ta pidiendo promesa bashi y sin base, nan ta pidiendo proteccion, structura y accion inmediato.
E mocion noble di fraccion di PPA no a sali for di politica partidista. Al contrario, e ta basa riba loke e mesun partido di AVP y FUTURO a inclui den nan Plan di Gobernacion. PPA a simplemente pidi y urgi gobierno pa haci loke nan mes a priminti.
Dentro di 6 luna: Proteccion y contesta inmediato
E mocion ta urgi gobierno pa dentro di seis luna entrega un plan nacional di maneho, conscientisacion y profesionalisacion pa violencia relacional. Esaki ta pa garantisa cu tur victima ta ser trata cu respet, humanidad y sin prehuicio, pa medio di tur stakeholdernan: polis, ambulance, cuido, trahador social y sistema huridico.
Un punto crucial ta training uniforme pa polis y ambulance. Esnan cu ta yega prome na un ‘melding’ por determina si un situacion ta stabilisa of escala. Un eror den e prome reaccion por pone un victima na mas peliger.
E mocion tambe ta urgi pa dentro di 6 luna haya fondo pa:
- Un campaña nacional di conscientisacion;
- Un structura di comunicacion y guia cu ta duna victima sosten psicologico y legal;
- Informacion continuo na victima y famia tocante progreso di nan caso.
E victimanan di violencia relacional ta entre esunnan mas vulnerabel den nos sociedad. No por laga nan nan so, confundi y sin informacion y conseho adecuado y corecto.
Dentro di 6 luna: Trata e agresor pa kibr’e ciclo
Violencia relacional no ta stop cu castigo so. E agresor cu no haya tratamento, ta keda un agresor. E mocion ta exigi cu dentro di 6 luna, Ministerio di Husticia:
- Apunta un departamento special pa maneho di e agresornan;
- Crea un team profesional pa trata nan;
- Desaroya un programa di reintegracion social cu no ta limita na ‘anger management’, pero cu ta aborda e problema compleho tras di un conducta violento.
Sin esaki, e ciclo ta sigui ripiti.
Dentro di 12 luna: Un Protocol Nacional
Pa dentro di 12 luna, gobierno mester crea un Protocol Nacional di Atencion, Proteccion y Derivacion pa e victimanan y e sobrevivientenan di violencia relacional. Esaki mester garantisa:
- Asistencia multidisciplinario y integral;
- Coordinacion entre polis, cuido, husticia y social;
- Un sistema cu realmente ta proteha y no retraumatisa.
E cambionan di ley real
E mocion ta pidi p’e cambionan di ley ta ancra den ley y no djis den un ‘aanwijzing’, manera un parlamentario a indica na su persona. Un punto clave ta: e agresor mester sali di e hogar pa minimo 3 dia y no e victima! Aworaki ainda hopi biaha ta e victima mester bay shelter of cerca un famia of conocir, creando asina mas trauma.
Un voto contra esunnan mas vulnerabel
P’esey e mocion di PPA tabata uno dirigi riba e aspecto humano, profesional y alinea cu Plan di Gobernacion di AVP y FUTURO, pero lamentablemente nan mes a vota contra, cu excepcion di colega parlamentario Mike de Meza y fraccion di MEP. “Diahuebs proximo Parlamento lo bishita Fundacion Contra Violencia Relacional. Fraccion di PPA ta spera cu esunnan cu a vota contra, por wak cualkier sobreviviente cu nan topa den nan wowo como tambe profesionalnan y splica nan dicon nan a vota contra e mocion, cu tabata un iniciativa y bos di nan den Parlamento”, Pieters a expresa.
Segun Eduard Pieters, Parlamento mester compronde cu violencia relacional no ta politica. Ta bida humano, ta dignidad y ta husticia. Fraccion di PPA lo sigui lucha y para pa esunnan cu no por para pa nan mes y asina laga nan bos keda resona.
