Nos proposito no ta pa husga hende, pero pa guia hende riba e caminda di berdad y bida.
Tin hopi cos cu ta tumando lugar, cu ta cosnan lamentabel, cosnan cu por wordo preveni, si hende tene cuenta cu dominio propio y pasenshi.
Falta di dominio propio tin hopi hende den problema y Dios ta spierta nos di esey.
Bo tabata sa cu e obesidad cu tur hende ta bringando contra dje ta falta di dominio propio?
Bo tabata sa cu adiccion ta falta di dominio propio?
Bo tabata sa cu adulterio ta falta di dominio propio?
Bo tabata sa cu embaraso hubenil ta falta di dominio propio?
Bo tabata sa cu debe ,mal maneho y problema financiero ta falta di dominio propio?
Bo tabata sa cu hacimento di redo ta falta di dominio propio?
Bo tabata sa cu buracheria ta falta di dominio propio?
Bo tabata sa accidente den trafico ta wordo causa pa falta di dominio propio y pasenshi?
Bo tabata sa cu adiccion na wega di placa ta falta di dominio popio?
Bo tabata sa cu pa falta di dominio , bo salud ta bay atras?
Bo tabata sa cu sin dominio propio y pasenshi no tin crecemento den bo bida spiritual?
Bo tabata sa cu dominio propio y pasenshi ta dos gran virtud,pa guia bo famia?
Bo tabata sa cu dominio propio y pasenshi mester wordo sembra den nos hobennan?
No ta pornada ta para scirbi den 2 Timoteo 3:1-5 tocante tempo trabahoso, pasobra awor mas cu nunca nos ta mira cu falta di dominio propio y pasenshi por ocasiona chaos den nos comunidad.
Hopi hende ta cay den violencia y discucion, pa falta di dominio propio, violencia domestico, violencia relacional, separacion temporal , divorcio, maltrato den famia, ta un muestra cu e dominio propio ta haci hopi falta.
Cuanto hende no a cay sera pa motibo di perversidad y sensualidad, y pa falta di dominio,propio?
Cuanto hende no a perde nan posicion, nan trabao, nan famia, nan cas pa falta di dominio propio?
Dominio propio y pasenshi ta dos fruta di Spirito Santo, cual ta para scirbi den Galationan 5:22, pasobra esey ta librabo for di pasionan y deseonan carnal cu ta contra boluntad di Dios.
Nos ta den temporada di Carnaval, un temporada cu dominio propio ta bay cu vacantie, hende ta haci cosnan di mas, bebe, come, droga,keda sin drumi,tene relacion sin control, bisti indecente,rabia y bringa,adoracion di dios falso,falta di respet pa mayor y tambe pa autoridad, aumento di sensualidad y perversidad, y tur e cos ey tin nan consecuencia doloroso,
Cuanto hende no a hanja accidente den e temporada aki, cuanto hende no a perde yiu y famia den e temporada aki, cuanto hende no a cay sera den e temporada aki, y tin di nan a perde hopi anja di nan bida den prison, caul a causa cu nan a perde bon trabao, cas y famia, djis pa falta di dominio propio y pasenshi.
E palabra di Dios ta corda nos: Comprende esaki, mi rumannan stima, Tur hende mester ta lihe pa tende,no lihe pa papia, no lihe pa rabia, pasobra rabia di hende no ta produci e husticia di Dios.(Santiago 1:19-20)
Den Galationan 5: 19-21 e palabra di Dios ta sinja nos tocante, e obranan di carni, laga nos tene cuenta cu ora nos ta participa den obra di carni, e dominio propio y pasenshi no ta obra den nos, y pesey Pablo ta roga y ta adverti cu esnan cu ta praktica e cosnan aki lo no hereda e reino di Dios.
Sinceramente, Pastor Marcel Balootje
