Plataforma Aruba, den colaboracion cu Art Rap Foundation, ta presenta e exhibicion di e prome modulo di Perspectivanan Invisibel, un programa di fotografia inclusivo crea pa hende ciego of cu limitacion visual.
E exhibicion ta habri oficialmente diasabra, 24 di Januari, cu un apertura publico for di 7:30 te 9:30 p.m., na Art Rap Foundation na San Nicolas, y lo keda habri te 24 di Februari.
Perspectivanan Invisibel ta un programa implementa bou guia di artista y documentarista Rafael Barragán den colaboracion cu FAVI Aruba.
Durante tres luna di trabou intensivo, e participantenan a sigui tayernan basa riba metodo sensorial, unda nan a explora fotografia via sonido, tacto y experiencia.
E curso a inclui teoria y practica riba framing, angulo, luz y composicion, cu enfoke principal riba storytelling y expresion personal.
E exhibicion ta marca e culminashon di e prome modulo di e programa y ta mustra e obranan crea pa 10 creativonan ciego of cu limitacion visual, compartiendo nan manera unico di mira y conta nan historia via arte.
Art Rap Foundation, funda na 2008, tin como mision pa duna visibilidad na creatividad di e Caribe Hulandes y conecta talento. Situa den curason di San Nicolas, Art Rap ta combina arte, comunidad y educacion, y ta cas di ZEER TROPISCH Art House, un espacio dedica na arte contemporaneo y expresion cultural.
Plataforma Aruba ta desaroya proyectonan cultural y educativo cu enfoke riba inclucion y acceso den arte. Via iniciativanan manera Perspectivanan Invisibel, Plataforma Aruba ta crea oportunidadnan pa mas hende por participa, crea y comparti nan voz den espacio cultural.
Informacion di exhibicion
Apertura: 24 di Januari, 7:30 – 9:30 p.m.
Periodo di exhibicion: 24 di Januari – 24 di Februari
Luga: Art Rap Foundation, Bernard van de Veen Zeppenfeldstraat 67, San Nicolas
Entrada: Gratis y habri pa tur hende 10 AM – 6 PM
Despues di e exhibicion aki, Perspectivanan Invisibel lo sigui cu Modulo 2, cu enfoke riba fotografia analogo.
Pa mas informacion: coordinator@plataformaruba.org
+297 742 5366
