Cu profundo tristesa y respeto nos ta despedi di Gloria Bryce, actris, directora teatral, pedagoga y un di e fundadornan di Art Rap Foundation. Su fayecemento ta laga un bashi grandi den bida cultural di Aruba, pero tambe un marca profundo cu ta sigui biba den hende, proceso y conciencia cu ela yuda forma.
Pa mas cu tres decada, Gloria Bryce a dedica su bida na guia, dirigi y prepara hopi hende cu awe ta cumpli rolnan importante riba e isla, no solamente den mundo di arte, sino tambe den educacion, comunicacion, gestion cultural y otro campo. Hopi biaha tabata Gloria cu a sostene e proceso ora cu no tabata tin seguridad. Gloria a mustranos cu rigor por bai huntu cu ternura, y cu arte ta, prome cu tur cos, un acto di responsabilidad humano.
Su trabou a pasa dor di institucionnan fundamental den ecosistema cultural di Aruba, manera Instituto di Cultura Aruba, Cas di Cultura, Switch Foundation, CAA Creative Arts Aruba, TeleAruba, FARPA y e Bienal di Aruba, entre hopi otro iniciativa cu a marca e desaroyo artistico di e isla den e ultimo decadanan. Gloria tabata presente tanto den proyecto visible como den proceso silencioso, caminda su arte no tabata busca protagonismo, sino sentido.
Como creadora, semper a mantene un actitud habri pa dialogo y contemporanidad. Ela traha riba propuesta artistico huntu cu Nelson Gonzalez, cu Darwin Winklaar y cu otro personalidadnan di arte arubano, aportando experencia, escucha y un etica di trabou hopi comprometi.
Durante mas cu trenta aña, ela tabata mentora di e artista Tuesday Irwin, acompañando su desaroyo creativo y humano cu un constancia poco comun. Asina mes, ela sigui di serca, cu hopi orguyo, e caminda di Shamira Raphaëla, ken ela a mira como un ehempel di superacion, claridad artistico y fuerza expresivo for di otro medio, no escenico, pero mesun potente. Den nan dos, Gloria a mira confirmacion cu ora bo siembra cu honestidad, e fruto cu sali ta diverso y necesario.
Nos cu a traha di serca cu Gloria sa cu su legado no por wordu medi solamente den obranan dirigi, taller duna o funcionnan presenta. Su herencia ta biba den manera di mira e otro, den e exigencia cu cariño, den respeto pa proceso, y den conviccion cu arte por sostene, ordena y dignifica bida.
Awe e actris a fayece.
Awe un presencia escenico irrepetibel ta keda na silencio.
Pero e obra no ta caba. Nos ta agradeci profundamente e conocemento heredá y e caminda compartí. Nos ta sera un escena cu tristesa y gratitud, sabiendo cu tin silencio cu ta bisa mas cu cualkier palabra.
Ora silencio ta bira e mihó palabra…
