Minister di Finansa, Asunto Economico y Sector Primario, mr. Geoffrey Wever, ta invita henter pueblo di Aruba na e venidero Mercado di Santa Rosa cu lo tuma lugar diasabra awor, 31 di januari.
E Mercado di Santa Rosa ta uno masha popular na unda cu varios bendedonan ta haya e oportunidad di promove nan productonan local cu clientenan durante e mercado. Esaki ta un parti di nos cultura importante, y ta un manera cu e pueblo di Aruba por disfruta di productonan local, y na mes momento contribui na e economia local y apoya e cunukeronan y agricultornan di Aruba.
Ta importante tambe pa comparti cu si bo persona kier participa cu bendemento di producto na e mercado di Santa Rosa, ta haci un peticion pa registra na tempo ya cu espacio ta limita.
Por registra cerca Santa Rosa via un email manda na info@santarosa.aw of por pasa personalmente na e oficina di Santa Rosa cu ta citua na Piedraplat 114-A. Tambe por tuma contacto via telefon na 585-8102
Tur producto cu ta wordo bendi na e mercado di Santa Rosa ta produci localmente, y tur cuminda crioyo tin e “carchi berde”.
Minister Geoffrey Wever ta felicita Santa Rosa pa e bon trabou cu nan ta bon ta haciendo y pa e apoyo cu nan ta duna na e sector primario, cual ta un parti importante di nos cultura y economia di Aruba.
