Durante su salida for di Aruba, ex-Prome Minister di Hulanda Jan Peter Balkenende a haya un recorido door di e area di baggage claim na Aeropuerto Internacional Reina Beatrix como parti di e presentacion di e proyecto Gateway 2030. E bishita a laga un impresion fuerte riba Balkenende, kende a elogia e nivel tecnologico cu Aruba a logra den e infrastructura aeroportuario.
Segun Balkenende, Aruba ta mustra cu tecnologia di nivel mas halto internacional no ta limita na pais grandi. Al contrario, el a destaca cu loke a implementa na Aruba ta considera state-of-the-art, igual cu nivel mundial.
“Wat hier op Aruba is neergezet, is state-of-the-art voor de top van de wereld,” Balkenende a bisa.
E ex-Prome Minister a expresa cu el a keda particularmente impresiona cu e manera cu e tecnologia nobo ta maneha y opera. Segun Balkenende, e sistema ta altamente sofistica y representa un ehempel di con innovacion por ta implementa di forma exitoso.
“Het is een geheel nieuwe technologie, “sophisticated”. En dan zie je dat Aruba een front-runner is,” Balkenende a enfatisa.
E elogio di Balkenende ta reforsa e posicion di Aruba como un isla cu ta sigui inverti den modernisacion y excelencia operacional, colocando su aeropuerto na un nivel competitivo internacionalmente. Su reaccion a confirma cu Aruba no solamente ta sigui desaroyonan global, pero tambe ta posiciona su mes como un front-runner den implementacion di tecnologia avansa.
