Nos mester ta consciente di e tempo den cual nos ta bibando, pasobra ta tempo pa para firme den Senjor y perservera, bisti e armadura completo di Dios, pa nos por para firme contra e trampanan di e enemigo. Pasobra nos lucha no ta contra carni y sanger, e cosnan cu ta sosode actualmente, nos no por bringa contra di nan carnalmente, nos mester drenta un lucha spiritual den cual Dios mes ta bay nos dilanti , pasobra e armanan cu nos tin ta poderoso den Dios pa basha e fortinan abao.
No ta tempo pa kere den tur cos cu hende ta papia, pero ta tempo pa consulta cu e palabra Dios, pa nos ta completamente na altura cu nos ta den e boluntad di Dios.
Tin hopi trosemento di palabra di Dios, tin hopi hende su orea ta kishiki, pa tende locual cu nan kier y no locual e palabra ta bisa, y asina sigi biba manera nan kier aunke cu nan conoce Dios.
E palabra di Dios ta edifica, fortifica, encurasha, disiplina, y guia nos bida, hopi hende kier wordo edifica , pero nan no ta comprende cu prome cu bo crece bo tin cu wordo displina, mescos cu si nos kier pa un mata crece bunita nos mester snoei e mata pa asina e ta bon forma, awel asina Dios ta haci cu nos bida.
Palabra di Dios ta bisa bon cla: Y hopi profeta falso lo lanta,y lo ganja hopi hende,pasobra inikidad lo aumenta,amor di hopi hende lo fria.Ma esun cu perservera te na fin esey lo ta salba.( Mateo 24:13).
Perservera ta nifica pasa den prueba y lucha y keda para pa Senjor, keda depende di Senjor , no flakea, sigi padilanti, cu fe, pasobra e palabra di Dios ta bisa:
Pesey no tira boso confiansa afo,cual tin un gran recompensa. Pasobra boso mester tin perserverancia, pa ora boso haci boluntad di Dios, boso ricibi loke a wordo priminti. Pasobra denter di masha poco tempo: Esun cu ta pa bini, lo bini y lo no tarda,. Ma e husto ta biba pa medio di fe; y si e hala atras. Mi alma no tin placer den dje.(Hebreonan 10:35-39).Ma nos nos ta di esnan cu ta hala tras pa destruccion, sino di esnan cu tin fe pa preservacion di e alma.
Tin mentira grandi ta bay rond riba mundo pa debilita fe di hende, pasobra tin hopi hende ta kere den hende, y ora algo pasa cu e persona, nan tambe ta aleha for di Dios, pasobra nan a pone nan bista riba hende y no riba Dios.
No ganja boso mes, Dios no ta laga haci bofon di dje,pasobra loke un hende sembra, esaki tambe e lo cosecha.( Galationan 6:7).
Hende ta resisti Dios, hende ta ninga di reconoce Dios, hende no ta hanja ta necesario pa reconoce Dios y ta prefera haci scuridad nan Dios, inmoralidad ta nan Dios, door cu e enemigo ta ciega hende pa nan no mira e lus di Cristo.
Bendiciona ta e hende,cu ta perservera den prueba, pasobra una bes cu e a pasa e prueba, e lo ricibi e corona di bida, cu Senjor a priminti na esnan cu ta stim’E.( Santiago 1:12)
Mantene bo fe sigi perservera den Senjor, no entrega, no cay pa e tentacion di mundo, e fiesta di mundo, no pone bo Dios su cara na berguensa, para firme y fiha boso wowo riba Hesus.
Ta hopi cos tin awendia cu ta pone hende fria y kita nan bista for di riba Dios.
Nos tur ta yama pa perservera.
Sinceramente, Pastor Marcel Balootje
