Diamars 3 di februari 2026 a tuma lugar un reunion importante entre San Nicolas Business Association (SNBA) y e Comicion di Finansas, Overheidorganisaties, Cultura y Deporte di Parlamento. E encuentro aki, presidi pa mi persona Shailiny Tromp-Lee, ta un continuacion di e reunion cu a inicia dia 3 di december 2025.
Finales di Augustus, comienso di September 2025 tur Fraccion den Parlamento a ricibi e documento titula āVision for San Nicolas & Surrounding Districts 2025 & Beyondā for di SNBA. Como parlamentario mi a scan e documento aki y a pidi e Griffier di mi comision pa yama un reunion cu SNBA pa nan bin trata e documento aki cu nos comision. Un documento cu ta trata diferente puntonan manera diversificacion, posibilidad di inversion, actividad industrial, vivienda, desaroyo cultural y mucho mas.
Na final di e prome encuentro di dia 3 di December 2025, a keda palabra cu SNBA cu lo organisa diferente reunion separa pa trata e topiconan cu no por a keda debidamente atendi, cu e meta pa sigui atende posibel solucionnan pa retonan cu ta afecta nos pais y of pa trata plannan pa futuro, principalmente pa San Nicolas.
Durante e reunion di dia 3 di februari 2026 nos a enfoca riba e topico di Vivienda Pagabel (Affordable Housing) y a trata esaki extensamente. Segun e Plan Nacional di Vivienda pa Aruba di SNBA, nos pais ta enfrenta un deficit di aproximadamente 10.000 cas pa por cumpli cu e demanda actual. E maneho cu SNBA ta propone tin como vision pa garantisa cu tur residente di Aruba tin acceso na casnan di calidad, pagabel y sigur, empoderando e famianan cu actualmente ta paga huur pa nan por inverti den nan mesun hogar. Mirando e realidad riba e topico aki mi ta haya hopi importante y necesario pa scucha e opinion y solucion di diferente stakeholders. Pasobra e ta un topico cu nos mester sigui atende como prioridad y cu urgencia.
SNBA a splica e motibonan pakico segun nan e sistema actual ta faya:
- Financiamento: e banconan ta exigi un pago inicial (down payment) di 15% pa 30%, locual ta imposibel pa hopi famia spaar.Ā Ā
- Permisonan: E proceso pa haya permiso di construccion ta dura entre 2 pa 3 aƱa, locual ta kibra e factibilidad financiero di e proyectonan.Ā Ā
- Oferta: E prijsnan di construccion ta infla debi cu e sector di construccion ta priorisa proyectonan den turismo unda e ganashi ta mas halto.Ā Ā
Alabes durante e reunion SNBA a presenta posibel solucionnan y un strategia basa riba tres pilar fundamental pa resolve e crisis di vivienda:
- Sosten Financiero: nan ta propone creacion di un Fondo Nacional pa Vivienda cu lo wordo financia pa medio di entre otro un contribucion boluntario di empleado/empleador, un “Tourism Transfer Tax” di 2% riba transferencianan di turismo, y un cobransa riba rentals di corto duracion manera Airbnb.Ā Ā
- Acelera e proceso di permiso: nan proposicion ta pa crea un solo oficina di permiso (One-stop shop) unda tur instancia (DOW, DIP, WEB, Elmar, etc.) ta colabora pa duna contesta den un maximo di 3 luna.
- Construccion na Scala: Implementacion di proyectonan ya diseƱa, manera un ehempel di 63 cas cu ta cla pa wordo ehecuta cu prijsnan cuminsando na Afl. 285,000.Ā Ā
Tur ta posibilidadnan cu na mi opinion como Parlamento nos mester urgi gobierno pa explora y duna atencion den tur seriedad.
Reunionnan cu SNBA lo continua
E serie di reunionnan cu SNBA lo continua. Siguiente ta diahuebs 5 di februari 2026, caminda lo focus riba e parti di energia.Como Parlamentario mi ta enfatisa e importancia vital di e topiconan aki pa e futuro di Aruba. Sinembargo, mi mester expresa tambe cu ta un lastima cu ni un representante di fraccion di Futuro, ni un representante di e fraccion di AVP tabata presente den e reunion aki.
E crisis di vivienda no ta refleho di un cifra abstracto, sino un lucha diario pa miles di famia. E presencia di e partidonan aki den dialogonan importante cu stakeholders riba e topico aki ta fundamental y pesey mes mi ta haya lamentabel cu nan no a asisti na e reunion. Ta spera cu awe si nan lo ta presente pa e siguiente sesion.
