Durante e Common Good Conference, Francielle Laclé , di Ministerio di Naturalesa y Medio Ambiente, a pone enfasis riba e conexion profundo entre e bon comun y e cuido di naturalesa na Aruba.
Segun Lacle, e bon comun no ta limita na relacion entre hende so, pero ta inclui tambe e areanan cu ta di nos tur como comunidad, manera nos playanan y nos biodiversidad unico. El a menciona specificamente e parhanan iconico manera e prikichi y e shoco, e ultimo siendo un simbolo nacional, como parti integral di e herencia natural cu nos mester proteha.
“E bon comun ta presente den loke ta di nos tur: nos beachnan, nos biodiversidad y nos parhanan. Esaki ta algo cu nos mester cuida hunto,” segun Laclé .
Un punto central di su mensahe tabata e rol crucial di educacion. Laclé a enfatisa cu ta escencial pa integra mas conocemento riba naturalesa y medio ambiente local den e curiculo escolar, pa asina crea un conexion tempran entre mucha y nan entorno natural.
Segun Francielle Laclé , ora mucha conoce nomber di bestia, nan ta compronde con naturalesa ta funciona y ta siña di tradicionnan manera pesca y plantacion, nan ta desaroya no solamente conocemento, pero tambe amor y respet pa nan pais.
“E conexion cu naturalesa ta cuminsa di chikito, den educacion y den experencia diario,” Laclé a subraya.
Laclé a enfatisa cu e mensahe di bon comun tambe, ta un invitacion pa reflexiona riba con cada persona por contribui, no solamente na nivel grandi, pero tambe den accion chikito di cada dia: yuda un hende cu tin problema, cuida loke nan tin rond di nan, y mantene un relacion fuerte cu nan bario, famia y comunidad.
Segun Laclé e bon comun ta algo cu ta biba y practica den proximidad: cu bisiña, cu naturalesa cu ta riba nos dushi isla, y cu e mundo mas amplio cu nos ta forma parti di dje.
Nos aporte pa reenforsa e idea cu e bon comun ta cuminsa cerca di cas, den respet pa naturalesa, educacion di generacionnan nobo y accion consciente di cada ciudadano pa cuida loke ta di nos tur.
