Durante e Common Good Conference, Govert Buijs, profesor di filosofia politico y filosofia di economia na Vrije Universiteit Amsterdam, a comparti su impresion di Aruba y riba e manera cu e bon comun ta keda pone na practica riba nos isla.
Segun Buijs, for di su prome impresion el a nota e amabilidad di e pueblo Arubiano, pero a keda specialmente impresiona durante su bishita na e exposicion comunitario, caminda el a topa un gran diversidad di iniciativa social ya existente riba Aruba.
“E bon comun ta algo cu nos mester haci hunto. Esey ta e escencia di civil society,” Buijs a agrega.
Govert Buijs a elogia e enfoke fuerte cu Premier Mike Eman ta pone riba e tema di e bon comun, describiendo e iniciativa como algo cu ta schaars y necesario den hopi pais.
Segun Buijs, civil society y e bon comun ta constantemente bou presion, y p’esey mester un lider cu ta stimula ehempel concreto. El a indica cu, den su opinion, pais manera Hulanda mester lider cu un vision asina, y cu Aruba por bira un punto di referencia.
“E idea cu Aruba por sirbi como un tipo di guiding star pa Hulanda y otro parti di mundo ta hopi atractivo,” segun Buijs.
El a menciona proyecto cu ta enfoca riba adulto mayor, persona cu limitacionnan fisico, persona cu adiccion, pero tambe iniciativanan pa proteccion di naturalesa, medio ambiente y boluntarismo.
“Mi a keda realmente impresiona cu tur loke hende riba Aruba ta haci caba pa contribui na e bon comun,” segun e profesor.
Den su reflexion, Buijs a enfatisa cu e bon comun no ta algo cu por laga na su suerte. Al contrario, e ta algo cu mester stimula constantemente, discuti y practica hunto como sociedad.
El a splica cu, ademas di bon comun priva y bon comun publico, tin tambe loke el yama “bon comun relacional”: cosnan cu solamente por crea ora hende ta haci nan hunto, manera deporte, boluntario of participacion comunitario. Segun Buijs, precisamente den e area aki civil society ta hunga un rol crucial.
E testimonio di e profesor ta reenforsa e mensahe central di e conferencia: cu e bon comun no ta solamente un concepto teoretico, pero un practica diario cu ta depende di colaboracion, inspiracion y compromiso continuo di comunidad, gobierno y organisacionnan riba Aruba y mas leu.
