Miembronan di Aruba Timeshare Association, ATSA, a reuni pa un lunch-meeting na La Cabana Beach Resort & Casino cu representantenan di e isla su propiedadnan di Vacation Ownership. ATSA su president, Sulaika Kelly, di Playa Linda Beach Resort a yama bon bini na tur miembro net prome cu oficialmente habri e reunion, cu invitadonan special, studiantenan di e segundo aña di FHTMS na Universidad di Aruba.
Di tres encuesta completo
E grupo di binticinco studiante recientemente a conduci un di tres encuesta di nos bishitante relata na timeshare, asina continuando un tradicion duradero cu a inicia na 2008, di cual a sigui na 2017 cu e di dos estudio. Esun mas recien a keda conduci na 2025 cual a colecta contesta for di mas di 3500 doño di timeshare y algun bishitante cu ta keda den e propiedadnan aki rond nos isla.
Kelly a gradici e facultad, tur honorario invitado, incluyendo CEO di Aruba Tourism Authority Ronella Croes, p’e esfuerso colaborativo aki cu ta subraya e colaboracion fuerte entre academia y nos industria di turismo. Durante e encuentro algun miembro a duna update tocante inversionnan andando na nan resort. Mientras cu mey mey di High Season, percurando pa por atende cu tur necesidad di nan bishitantenan y manehando tur cos na nan luga, e hoteliers a tuma tempo pa raporta riba desaroyo y plan pa futuro, compartiendo informacion di negoshi hopi importante.
TPEF Eagle Beach Beautification Program ta un proyecto cu ta sigui. E tipo di matanan cu ta planta ta algo dicidi pa DOW, kende ta encarga den ehecuta e proyecto, percurando pa faborece variedadnan local.
Maneho di desperdicio na beach
Desperdicio ta wordo colecta rond area di beach cinco bes pa siman, anto e otro dos dianan lo rekeri cooperacion di e beachfront resorts pa yuda mantene e area limpi, hunto cu e publico tambe. E asociacion tambe a subraya e parti di lifeguards riba beach cual ta algo cu a wordo sugeri pero fuera di tin cune costonan halto e ta habri porta pa otro problemanan legal.
Seguridad den area turistico
Aruba Hospitality y Security Foundation a tene un encuentro cu minister di Husticia pa discuti e colaboracion di Tourism Security Patrol Aruba, hunto cu KPA Cuerpo Policial di Aruba – cu un presencia maritimo eventualmente na caminda. E fundacion kier expande su servicionan duna pa TSPA, actualmente for di 7am pa 11pm, cu number di telefon 911 disponibel y tambe activo pa brinda servicio pa 24 ora pa emergencianan. Agentenan di TSPA ta ciudadanonan, nan t’ey pa yuda, nan no tin autoridad legal. Nan ta move rond den vehiculonan electronico y ekipa cu body cams cual nan ta activa ora ta necesario. TSPA ta hunga un rol grandi den expande y sostene seguridad den area turistico.
Menos ora di trabao den horeca
La Quinta Beach Resort oficialmente a introduci un siman di 37 ora di trabao pa su empleadonan. Cu stage adicional atendiendo cu operacionnan diario, empleadonan por beneficia awor di orario di trabao reduci, cual ta permiti nan pa concentra mas ainda ariba nan bienestar y nan famia, un bon balans entre trabao y bida diario.
Renobacionnan y Turismo responsabel
E resort tambe ta den proceso di inversion grandi pa loke ta embeyecemento y upgrades pa transforma su mes den un Boutique Vacation Ownership Resort, cu certificacion internacional Travelife, un programa comprensivo di sostenibilidad diseña pa promove turismo responsabel manera tambe impacto comunitario. Amsterdam Manor Beach Resort a informa tambe cu nan a caba di completa nan fase di renobacion y lo cuminsa atrobe traha riba algun otro updgrades rond e resort e aña aki. Casa del Mar tambe ta bezig ta upgrade nan parkinglot, instalando smart room keys y revisando nan maneho di humamento – prohibiendo humamento dus den areanan publico.
Mas upgrades
Playa Linda ta den proceso di upgrade y reemplasa nan panel electrico principal pa asina engrandece nan sistemanan y sostene operacionnan cu ta bini pa futuro. Divi Phoenix a reemplasa tur metal-railing, instalando dehumidifiers nobo den tur camber, como tambe a upgrade ful nan grid electrico. Trabaonan grandi y sigur beneficioso.
Na Ocean Club, un Lighthouse Tower di 300 camber cual a keda construi bintiun aña pasa, a ricibi un renobacion total cu un bunita verf nobo den color pink/coral. Su famoso Lazy River tambe lo haya su renobacion den september di e aña aki. Surf Club ta un otro cu a haci upgrade cumisando cu un area di pool ful nobo, un espacio outdoor renoba cu stul blanco estilo lounge nobo nobo cu nan paraplu y mas panel solar. E edificio a haya un verf completo di ariba te abao c’un color turquoise como accent. Costa Linda a renoba su beachfront restaurant y bar. Paradise Beach Resort ta orguyoso di su area di pool nobo, y tambe ta den renoba su restaurant. Mientrastanto el a introduci un food truck mientras cu e restaurant ta bao construccion. E resort ta den plan pa verf e parti pafo di e edificio. La Cabana Beach Resort & Casino awor tin tres jacuzzi, anto e area nobo di pool ta hayando hopi bon feedback di tur bishitante. Tin cuater stacion pa carga telefon instala pa engrandece e bishitante su experiencia y accesibilidad, como tambe cabana luhoso priva y iluminacion nobo, ta algun di e upgrades introduci.
Como president di ATSA, Kelly a raporta cu e asociacion lo continua su colaboracion cu institucionnan di educacion riba e isla organisando World of Vacation Ownership pa studiantenan, publicando dos newsletter den 2026 y tambe siguiendo na promove Evolution of Timeshare – esey ta un documentario cu a sali aña pasa.
Tocante ATSA
ATSA tabata estableci na 1994 y actualmente ta conta cu miembresia activo di mayoria di propiedadnan di vacation ownership na Aruba. E asociacion ta traha na nivel local hunto cu entidadnan gubernamental. Na nivel regional, unda Aruba ta sigui ricibi reconocemento manera un destino modelo pa vacation ownership, ATSA tin laso profesional y ta beneficia di colaboracion continuo cu ARDA, American Resort Development Association.
Miembronan di Hunta Directivo di ATSA ta: Sulaika Kelly, President; Rina Geerman, Secretario; Pedro Vargas, Miembro di Hunta; Jurgen van Schaijk, Tesorero; y Luigi Heredia, Miembro di Hunta.
