Ta para scirbi den e buki di Job 5:2 : Pasobra rabia ta mata hende bobo, y envidia ta mata hende simpel.
Y nos tur sa cu tanto rabia como envidia no ta obra pa bon den nos bida, pasobra ningun di nan no ta bini di Dios.
Tin cosnan cu hende ta kere ta bon y hasta ta broma cune, por ehempel mi ta rabia, y mi no ta papia cu ningun hende, of mi no kier pordona, of mi no gusta tal persona pasobra e ta kere cu ta masha cos e ta , y nan no ta tene cuenta cu nan salud mental.Pasobra Envidia y Arogancia ta haci hende malo.
Den e buki di Santiago 3:13-18 e palabra di Dios ta sali dilanti como prevencion bisando:
Ken entre boso ta kere cu e ta sabi y huicioso? Laga e mustra door di su bon conducta su obranan den suavidad di sabiduria.
Ma si boso tin envidia amargo y egoismo den boso curason, no sea arogante y asina ganja contra e berdad. E sabiduria aki no ta esun cu ta baha bin for di ariba, ma e ta terenal, natural y diabolico.
Pasobra caminda ta existi envidia y egoismo, tin desordo y tin tur sorto di cos malo.
Ma e sabiduria di ariba ( E sabiduria di Dios) primeramente ta puru,despues pacifico,suave,rasonabel , yen di misericordia,y bon fruta,imparcial, sin hipocresia. Y e simia,cual su fruta ta husticia,ta wordo sembra den pas door di esnan cu ta haci pas.
Envidia y amargura no ta respeta cas di famia, ni tampoco matrimonio, pasobra caminda e hanja porta habri e ta drenta, y e ta manifesta di un forma fini, pa no keda ripara, te na e momento cu bini un explosion den Famia ( No lubida e historia di Cain y Abel ni tampoco historia di Rey Saul y David).
Esun cu no ta rabia lihe, tin gran comprendemento,ma esun cu ta rabia lihe ta halsa bobedad.( Proverbionan 14:29).
Un curason trankil ta bida pa e curpa,ma envidia ta putrimento di weso.( Proverbionan 14:30).
Envidia y amargura ta haci danjo na curason di hende, pasobra maske bo envidia, maske cuanto bo curason ta amarga, toch nada lo bay cambia, pasobra Dios no ta bay kita nada for di ningun, pa duna bo, Dios no ta kibra bida di ningun hende pa haci otro felis, Dios no ta den asunto di falsedad y traicion, tur esey ta bini di diabel, pasobra e a bini pa solamente, horta, pa mata y pa destrui. ( Juan 10:10).
Ta masha importante pa segun bo tin un yiu cu ta creciendo, tira un bista den riba su pensamento y especial den su actitud, con e ta trata otro hende, y si bo mira algo di envidia ta bini dilanti, trata cu ne inmediatamente, y no purba tapa cos di un smile, pasobra mayan cu Dios kier lo bo tin cu derama lagrima, ora cos sali for di man.
Envidia, Arogancia, y Orguyo ta tene man cu otro, caminda uno tey e dos otronan tambe ta manifesta, y si den bo hubentud bo no arepenti y pidi busca liberacion den Cristo Hesus , lo bo crece y bira hende grandi, y nan lo keda den bo bida, y lo pone bo cara na berguensa.
Mira pa ningun hende no keda sin alcansa e gracia di Dios, pa ningun rais di amargura,no spreit y causa problema, y door di esaki hopi wordo contamina.
Mayor tene bon cuenta cu ora cu abo ta trece envidia y arogancia den cas, bo yuinan tin hopi chens di wordo contamina.
Sinceramente, Pastor Marcel Balootje
