Gobierno anterior di MEP a laga haci un estudio nacional cu a resulta den e rapport Jeugdmonitor 2024. E estudio aki tin informacion valioso tocante e situacion social di nos pais. Entre diferente punto, Parlamentario John Hart a revisa e documento y a scoge pa cuminsa na enfatisa riba e estado di nos barionan.
E rapport ta mustra cu pobresa na Aruba no ta un incidente aisla, sino un problema sistematico. Barionan cu ta deteriora ta contribui na desigualidad social, cu consecuencianan directo pa siguridad, enseñansa y salud mental di nos hobennan. Deterioro fisico y social den barionan ta fortalece un sinti di pobresa y tin impacto directo riba calidad di bida di famianan.
Realidad ta cu den e ultimo añanan, specialmente den e ultimo lunanan, por conclui cu e gobierno anterior a laga hopi bario atras. Barionan ta mas deteriora cu nunca. Shete aña largo di falta di asumi responsabilidad pa asuntonan structural manera esaki ta parti di un problema mas profundo di maneho y vision.
Hart: “No por sigui sconde tras di COVID. E resultadonan di Jeugdmonitor 2024 ta despues di pandemia y ta confirma un patronchi cla: pospone responsabilidad na luga di enfrenta realidad,” e parlamentario ta expresa y ta comparti su argumentonan.
Diferente na e gobierno anterior, awor nos ta mira accion concreto den barionan. E inversion no ta limita na limpiesa; ta trata di un enfoke sistematico pa recupera barionan y restablece dignidad. Ta trata di asumi responsabilidad caminda otro gobierno a pospone esaki pa aña.
Ora cu e pueblo tabata sclama pa mehoracion di poder di compra di nos grandinan, e gobierno anterior no a destina fondo den presupuesto 2025 pa esaki. En bes di esey, a aumenta BBO di 3% pa 6% y despues pa 7%, a introduci BBO na frontera, y a pone presion adicional riba ciudadano. “Nos a mira mayornan cu a perde acceso na remedi, famianan cu tabata lucha pa sostene nan mes, y hobennan sin perspectiva cla pa futuro,” segun Hart.
Gobierno AVP/Futuro a trece un nota di cambio den presupuesto 2025 i pa 2026 ta sigui cu un rumbo nobo enfoca riba bienestar social. E aña aki a duna 250 florin na nos pensionadonan, y aña pasa tambe 250 florin. Esaki ta representa 500 florin den menos di un aña pa mas cu 22 mil pensionado na Aruba, incluyendo viuda y huerfanonan cu ta depende di esakinan.
“Como Parlamentario, mi ta considera esaki un paso importante pa pone prioridad bek den nos comunidad. Remedinan cu a wordo kita den añanan anterior ta wordo restableci. Esaki ta mustra direccion y compromiso. Ademas, presupuesto 2026 ta mustra un vision cla pa San Nicolas, cu construccion di un MFA lo fortalece desarroyo regional y infrastructura social.” Finalmente e parlamentario di AVP ta conclui reiterando cu nos pueblo merece un gobierno cu asumi responsabilidad, no uno cu pospone esaki. “E diferencia ta cla.”
