Durante un bishita den bario di Companashi den cuadro di Accion di Bario, Minister di Infrastructura, drs. Rene Herdé, a comparti su vision y compromiso pa mehora e calidad di bida den nos barionan.
“Nos a cana den bario paso pa nos, e bario ta na curason di nos politica. Nos ta kere firmemente cu barionan ta base di nos comunidad,” asina Minister Herdé a declara.
Segun Minister Herdé, e bishita no tabata solamente pa mira tocante e problema di limpiesa, sino pa scucha directamente dje hendenan di bario tocante nan preocupacion y necesidad. “Nos a bin pa scucha nan necesidad, pero e responsabilidad pa mehoracion ta di tur hende; gobierno y comunidad hunto.”
Minister Herdé a enfatisa cu gobierno ta trahando c’un enfoke mas structural. E plan no ta limita na limpiesa, pero ta inclui mehoracion di infrastructura, atencion pa problema social y colaboracion cu organizacion di bario.
“Tin casnan cu falta mantencion y problema di infrastructura cu a keda sin atencion pa hopi aña. Esaki ta mustra negligencia di pasado, pero awor nos ta tuma responsabilidad pa drecha loke mester drecha.”
Minister Herdé a recorda cu ora gobierno a forma, un di e compromisonan principal tabata rebiba nos barionan. Rebiba bario, segun Minister Herdé, ta nifica pa bay di cas pa cas pa scucha hende, identifica e necesidad real, inverti den infrastructura, pone atencion na reto social, fomenta cultura y desaroyo comunitario.
“Esaki no solamente ta un accion simbolico,” Minister Herdé a bisa. “E ta un compromiso cu nos a haci den campaña y cu nos tin cu cumpli.”
Segun Minister di Infrastructura, drs. René Herdé, e meta final ta pa mehora bida di hendenan den cada bario di Aruba.
