Durante su bishita di Colegio mas recien, Colegio di supervision financiero Corsou y Sint Maarten (Cft) a enfatisa e importancia di control adecua di e asina yama entidadnan gubernamental. Riesgonan financiero cerca e entidadnan aki por tin consecuencianan inmediato y negativo pa e presupuesto nacional. Cft ta urgi Corsou pa desaroya un politica di participacion integral. Di e manera aki, Gobierno ta haya mas bista riba riesgonan, y miho control di ingresonan di dividendo. Supervision adecua y un actitud activo di accionista ta fortalece e posicion financiero di Pais.
Entidadnan gubernamental ta ehecuta tareanan importante pa sociedad. Na mes momento, nan por trece riesgonan financiero pa Pais ora maneho financiero no ta adecua of si otro tipo di problemanan surgi. P’esey, supervision adecua ta esencial.
Cft ta señala cu den e presupuesto pa 2026, a inclui solamente XCG 7 miyon na dividendo di entidatnan gubernamental, mientras e entidatnan aki hunto ta genera mas cu XCG 100 miyon na ganashi. Esaki ta mustra cu Pais como accionista por dirigi mas activamente, por ehemplo haciendo acuerdonan cla tocante di distribucion di ganashi. Por uza ingresonan di dividendo adicional pa metanan social importante, manera Gobierno di Corsou ta reconoce tambe.
Servicio di Impuesto
Un aña pasa, Cft a urgi Pais pa atende cu e problemanan cerca Servicio di Impuesto activamente. Entretanto, Corsou a implementa algun cambio respecto di personal, sin embargo, no a haci suficiente progreso pa loke ta trata mehoracionnan structural.
E cantidad di aanslagnan pendiente ta bolbe crece. Despues di e accion di limpiesa na cuminsamento di 2023, e saldo di debenan di impuesto y prima a baha di XCG 5,6 biyon pa XCG 2,6 biyon. Entretanto, e saldo aki a bolbe aumenta te aproximadamente XCG 3,2 biyon, loke ta significa cu e saldo pendiente ta mas alto cu e ingresonan di impuesto y prima anual.
Cft ta enfatisa cu mester atende cu e reforma di manera activo. Cu implementacion mas efectivo y legal, Corsou por aumenta e ingresonan di impuesto structuralmente. Ademas, un sistema tributario den cual tur hende ta aporta, ta crea espacio pa reduci e carga di impuesto pa comunidad di Corsou.
Surplus presupuestario
Cft ta contento di tuma nota cu e calidad di e presupuesto a mehora. Entre otro danki na e condicionnan economico actual faborabel, Corsou ta proyecta surplusnan presupuestario multianual. Ta di sumo importancia pa efectivamente realisa e surplusnan aki, pa asina mehora e resiliencia di e presupuesto. Na mes momento, e circunstancianan actual ta bon momento pa implementa reformanan necesario y di e manera ey, fortalece e capacidad di crecemento structural di economia.
