Parlamentario di AVP, John Hart, den su rol como Presidente di Comision di Husticia di Parlamento, a pone riba mesa e discusion tocante e necesidad di un prizon nobo pa Aruba.
Minister di Husticia a informa Presidente di Comision di Husticia, Sr. Hart, cu den luna di maart 2026, United Nations Office for Project Services (UNOPS) lo bishita Aruba pa duna un presentacion oficial na Parlamento. Comision di Husticia ta considera esaki un paso importante, y kier tambe intercambia cu Minister riba e plannan concreto di Gobierno pa desaroyo di un facilidad correccional nobo, considerando e situacion di deterioro alarmante di Korrektie Instituut Aruba (KIA) na Santo di Patia.
UNOPS ta un organismo internacional cu ta brinda apoyo tecnico na proyectonan grandi di reconstruccion y infrastructura, financia pa partnernan internacional. Nan ta enfoca riba compra transparente, maneho profesional di proyecto y cumplimento cu normanan internacional. Entre otro, UNOPS a participa den reconstruccion y modernisacion di scolnan, facilidadnan medico y infrastructura publico den diferente pais.
Na juni 2025, Comision di Husticia a organisa un bishita di trabou (werkbezoek) na KIA, unda a tuma luga un intercambio extensivo cu e equipo directivo di e institucion. Durante e bishita, Hart a expresa su preocupacion profundo tocante e estado actual di e facilidad.
Segun Hart, e condicion infrastructural di KIA ta lamentablemente den un estado preocupante y no ta brinda un ambiente adecua ni pa personal ni pa deteni. “Nos mester reconoce cu e infrastructura actual no ta satisface e exigencianan minimo di un institucion correccional moderno. Un edificio nobo no ta un luho, pero un necesidad,” Hart a declara.
Ademas di e aspecto infrastructural, el a enfatisa cu tema di personal, siguridad y specialmente resocialisacion di preso mester ricibi prioridad den e periodo cu nos tin dilanti. “Un sistema correccional efectivo no ta limita su mes na detencion. Resocialisacion y reintegracion mester ta parti integral di cualkier plan serio pa un prizon nobo.”
Hart a indica cu e presentacion di UNOPS den Parlamento ta un oportunidad importante pa evalua opcionnan, comparti informacion tecnico y papia riba solucionnan sostenibel pa futuro. Como Presidente di Comision di Husticia, e ta comprometi pa mantene e discusion transparente y enfoca riba interes general di pais.
“Siguridad, dignidad humano y buen gobernacion mester ta e base di cualkier decision cu nos tuma. E debate riba un prizon nobo mester ta serio, fundamenta y orienta riba solucion realista pa Aruba,” Hart a conclui.
