Den e debate riba e prome cambio di presupuesto 2026, Maduro ta alerta: sin un sistema fiho pa informa Parlamento, caos ta bin pa pais.
Oranjestad, 5 di november 2026. Durante e reunion publico di Parlamento riba e prome cambio di presupuesto 2026, Parlamentario Xiomara Maduro (MEP) a splica pakico e manera cu gobierno AVP-Futuro ta maneha finansa publico ta un peliger pa pais.
“Nan ta gasta e placa prome, despues nan ta bin pidi permiso,” Maduro a bisa.
Sin sistema, ta caos
Maduro a recorda cu desde 2023, Minister di Finansa tabata bin na Parlamento cu e cambionan di presupuesto na comienso di aña, y cu un najaarsnota na fin di aña. Asina Parlamento y pueblo tabata sa unda e placa ta, unda pais ta para y kico ta e plannan pa resto di aña.
“Ora un minister di Finansa no por bin na comienso di aña cu e cambionan, y no por bin na fin di aña cu un najaarsnota, ora bo no por wanta na e sistematica ey, caos ta bini,” Maduro a bisa.
E prome cambio di presupuesto 2026 a wordo entrega na augustus, y Parlamento ta trat’e awe, 5 di november, cu menos di dos luna pa aña caba.
Un coalicion cu ta contesta otro publicamente
Maduro a señala cu e caos no ta keda den e cifranan. “Ora bo Minister-President ta tira palabra pa su partner di coalicion na Aruba, ta caos bo ta creando pa pueblo,” Maduro a bisa.
Despues di e declaracionnan cu Minister-President Mike Eman a haci riba television nacional, Minister Gerlien Croes di Futuro a contest’e den un entrevista na radio: “Bo ta bay Hulanda bay dialoga, pero e dialogo na Aruba ta mas importante. E dialogo cu bo gremionan, e dialogo cu bo hendenan.”
“Ora e Minister-President y su mes minister ta contesta otro den media, ken ta gobernando e pais?” Maduro a puntra.
Un chupa bebe pa pueblo
Segun Maduro, no ta basta pa anuncia proyecto.
“Ora bo bisa bo ta bin cu esaki of esaya, pero bo no ta sigui un procedura, bo no ta percura pa e placa ta aki, y bo no tin e aprobacion di Parlamento, bo ta mustra pueblo un chupa bebe cu ningun hende por chupa,” Maduro a bisa.
Pueblo mester compronde cu si Parlamento no ta haya informacion na tempo, Parlamento no por haci su trabou.
Kico a pasa cu e Afl. 15 miyon pa caminda?
Maduro a duna un ehempel concreto: e caminda di e brug di Rooi Afo. Den presupuesto 2025, MEP a laga Afl. 15 miyon disponibel pa drecha caretera. Bisiñanan di e area ta pidi pa e caminda wordo drecha, y colega parlamentario Carlos Bermudez a bay para cerca nan pa haci e reclamo publicamente. Maduro a manda pregunta na e minister responsabel tocante e caminda aki.
“Un gobierno tin Afl. 15 miyon pa drecha caretera, y e caminda di Rooi Afo ta keda mescos. Kico a pasa cu e 15 miyon?” Maduro a puntra. E ta pidi Minister di Finansa Geoffrey Wever y e minister di Infrastructura pa splica unda e placa a bay.
Bisa pueblo e berdad
Maduro a puntra gobierno directamente si e sistema di voorjaarsnota y najaarsnota lo keda, of si e intencion ta pa bin solamente na fin di aña pa pasa e cambionan.
“Bisa pueblo di biaha, pa nos sa. Si ta asina, nos lo bolbe bay atras como pais,” Maduro a bisa.
“Pueblo tin cu compronde kico ta pasando awe. Ora bo traha bruha, bo ta haya resultado bruha. Y e cos di awe ta bruha.”
