Secretario di Defensa di Estados Unidos, Pete Hegseth, a declara cu Estados Unidos no a cuminsa e conflicto cu Iran, pero cu nan lo termina esaki.
“Nos lo no tolera misilnan poderoso apunta riba e pueblo Mericano. E misilnan ey lo wordo destrui, hunto cu e produccion di misil di Iran. E marina Iraní lo wordo destrui. Y, manera Presidente Trump a bin ta bisa henter su bida, Iran lo no tin nunca un arma nuclear. Estados Unidos no a cuminsa e conflicto aki, pero nos lo termin’e. Si bo mata of menasa Mericanonan na cualkier parti di mundo , manera Iran a haci, nos lo persigui bo, y nos lo mata bo,” el a skirbi riba e red social X.
Desaroyo di e Conflicto
Estados Unidos y Israel a lanza un operacion militar contra Iran diasabra ultimo. Ciudadnan grandi di Iran, incluyendo Teheran, a wordo ataca. Cas Blanco a hustifica e ataque citando supuesto menasanan di misil y nuclear for di Iran.
E Cuerpo di Wardador di Revolucion Islamico (IRGC, unidadnan elite di e Forzanan Arma di Iran) a anuncia un operacion di vengansa na gran escala. Tabatin informacion di misilnan y dronenan lanza for di Iran, y sirenan di alarma di aire a zona den e area di Tel Aviv.
Impacto Regional
Segun e agencia di noticia Mehr, basenan militar di Merca na Bahrain, Jordania, Qatar, Kuwait, Emiratonan Arabe Uni (UAE), y Arabia Saudita tambe tabata obhetivo di e atakenan. Paisnan den e region ta cerando nan espacio aereo, y companianan di aviacion ta suspendiendo buelonan.
Television di estado di Iran a informa cu e Lider Supremo, Ali Khamenei, a keda mata den un ataque riba su residencia riba mainta di 28 di februari, y e pais a declara 40 dia di duelo.
