Union Patriótiko Boneriano (UPB) a celebra su di 57 aniversario di existencia diabierna 23 di october ultimo, cu un encuentro special caminda miembronan, simpatisantenan y sostenedornan di partido a reuni pa conmemora e fecha historico. E celebracion a brinda oportunidad pa reflexiona riba trayectoria di partido y su contribucion na desaroyo di Boneiro.
E actividad a transcuri den un ambiente ameno, cu atencion special pa e balornan cu durante mas di cinco decada a forma base di UPB. Siguiendo su tradicion, partido a inclui un momento spiritual, caminda un pastor a dirigi un oracion pa habri e celebracion.
Espacio pa tur generacion participa
Durante e encuentro, presidente di partido, e lider saliente y e lider interino a dirigi palabra na e presentenan. Despues, e programa a continua cu un concepto diferente denomina Open Mic Night, caminda tur participante tabatin oportunidad pa expresa su opinion, comparti experiencia y presenta idea tocante futuro di partido y Boneiro.
E iniciativa a resulta exitoso, segun organisadornan, pasobra tanto miembronan veterano como e generacion mas hoben a haci uzo di e oportunidad pa laga tende nan voz. E intercambio a crea espacio pa reflexion tocante pasado, presente y futuro di organisacion politico.
Presidente vitalicio di UPB, Rudy Ellis, no por a participa personalmente pa motibo di salud. Sinembargo, el a manda su disculpa y un mensahe por escrito, cu a wordo comparti durante e celebracion. Su contribucion a forma parti di e momento special pa miembronan presente.
UPB ta reflexiona riba futuro di Boneiro
Durante e aniversario, partido a dedica atencion tambe na situacion actual di Boneiro. Segun UPB, durante su existencia partido a participa den cambionan importante cu a contribui na adelanto di isla.
Sinembargo, e organisacion ta considera cu actualmente Boneiro ta enfrenta desafio cu ta exigi miho organisacion, direccion y liderasgo. Segun partido, pueblo ta expresa necesidad di un vision cla pa futuro y un administracion cu por responde na preocupacionnan di comunidad.
UPB ta considera cu e momento actual ta brinda oportunidad pa reafirma su compromiso cu Boneiro y demonstra cu e organisacion ainda tin capacidad pa contribui na desaroyo di isla.
Durante e celebracion, partido a enfatisa importancia di sosten di pueblo, reconociendo cu finalmente ta votadornan ta determina si UPB lo haya oportunidad pa guia Boneiro den un direccion diferente.
E aniversario no tabata solamente un celebracion di pasado, sino tambe un momento pa mira dilanti y evalua e papel cu partido kier cumpli den añanan venidero.
Cu 57 aña di historia, UPB a reafirma su compromiso cu union, participacion y bienestar di comunidad Boneriano, mientras cu ta busca fortalece su posicion politico pa futuro di Boneiro.
