Den un serie di declaracionnan impactante via su plataforma Truth Social, Presidente Donald Trump a duna di conoce cu forsa militar di Estados Unidos a logra destrui nuebe barco di guera di Iran. Segun e mandatario, esaki ta parti di e operacionnan recien den e region di Medio Oriente.
E mandatario Mericano a informa cu e barconan destrui tabata di gran importancia estrategico. “Nan a caba di informmi cu nos a destrui y hundi nuebe barco di guera Irani, algun di nan relativamente grandi y importante. Nos ta bay pa e resto. Pronto nan tambe lo ta flotando na fondo di lama!”, Trump a skirbi den su estilo saracteristico.
Atake na e Base Naval
Fuera di e barconan hundí, Trump a afirma cu e forsanan Mericano a ataka y destrui practicamente henter e Cuartel General Naval di Iran. A pesar di e magnitud di e atakenan aki, e Presidente a comenta cu un tono sarcastico: “Pa e resto, nan Armada ta masha bon!”.
Liderazgo Politico-Militar bou candela
Den declaracionnan adicional na prensa, e Presidente a sigura cu e ehercito Mericano ta tin gran exito den nan obhetivonan. Trump a menciona cu rond di 50 miembro di e mando halto politico y militar di Iran a perde nan bida durante e atakenan.
Durante un entrevista cu e presentadora di Fox News, Jacqui Heinrich, Trump a duna e cifra exacto di 48 lider cu a cay den un solo biaha. E noticia aki ta bin despues cu a confirma e fayecimento di e Lider Supremo di Iran, Ayatollah Ali Khamenei, hunto cu varios otro oficialnan di rango halto, como consecuencia di e agresionnan combina di Merca e Israel.
Avance rapido
“Ningun hende por kere e exito cu nos tin … y e ta avanzando rapidamente,” e mandatario a conclui, indicando cu e operacionnan militar lo sigui te ora cu e obhetivonan wordo cumpli completamente.
