Ombudsman di Aruba mr. sra. Jurima Bryson a publica e rapport “Het Luisterend Oog”, cual ta un investigacion haci door di Bureau Ombudsman di augustus te cu september 2025 y cu tabatin como meta principal pa Ombudsman tin un lista actual di instancianan cu ta cai bou di Landsverordening Ombudsman y pues bou di su mandato.
E investigacion a identifica 564 instancia na Aruba cu ta den competencia di Ombudsman, hopi di nan ta organisacionnan priva cu ta traha cu mucha y hoben, manera scolnan, centro di cuido pa mucha y instancianan di salud.
Kico e investigacion ta demonstra?
E investigacion ta mustra cu na varios instancia informacion importante no ta actual of disponibel, manera number di contacto, nomber di directornan of informacion tocante procedura pa entrega keho. Esaki ta haci mas dificil pa ciudadanonan y mayornan haña acceso na informacion pa entrega un keho.
Den sector cuido di mucha, investigacion a mustra cu menos cu mita di e centronan cu a wordo contacta tin un procedura di entrega keho cla y funcional.
E investigacion a mustra tambe cu e Registro Nacional di centronan di cuido no semper ta actual, pasobra por ehempel algun centro cu ta registra no ta operativo mas.
Pakico esaki ta importante?
Si un instancia no ta facilmente accesibel pa publico of e no tin un procedura di entrega keho cla, ciudadanonan no por haci uzo di nan derecho fundamental y entrega keho.
Bon accesibilidad y informacion cla ta importante pa pueblo su confianza den gobierno y pa proteccion di ciudadanon incluyendo mucha.
Kico Ombudsman ta recomenda?
Ombudsman a bin cu varios recomendacion entre otro pa gobierno y instancianan mehora transparencia, actualisa registronan y garantisa cu tur instancia tin un sistema di keho cla y accesibel. Esaki ta importante pa fortalece proteccion legal di ciudadanonan, specialmente di mucha y hoben.
E rapport ta forma un prome paso pa mehora accesibilidad, transparencia y manera cu kehonan ta wordo maneha den instancianan na Aruba.
Proximo paso
Ombudsman lo sigui progreso di instancianan encuanto con nan ta trata cu e recomendacionnan aki. Tambe Ombudsman lo keda den contacto cu ministernan concerni, instancianan y supervisornan encuanto esaki.
E rapport completo “Het Luisterend Oog” ta disponibel riba website di Ombudsman, www.ombudsman.aw/pa/publicacion/.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
- Facebook: Ombudsman Aruba
- Instagram: ombudsmanaruba
- LinkedIn: Ombudsman Aruba
