Diamars 3 di maart 2026, Comision di Salud di Parlamento a tene un reunion informativo y hopi productivo cu e departamento di Jeugdgezondheidszorg (JGZ) di Directie Volksgezondheid (DVG).
Durante e reunion aki, a keda demostra cu tin un vision solido y hopi trabou den ehecucion y of den “tapara” pa garantisa un desaroyo sano pa tur mucha y hoben na Aruba.
Parlamento a wordo informa riba e esfuerso grandi cu e team multidisciplinario di JGZ ta desplegando. A resalta cu, apesar di limitacionnan, e departamento ta den un fase importante di transformacion caminda hopi proyecto crucial ta den etapa di planificacion avansa y of den implementacion.
Avance y Proyectonan den Tapara
Un di e puntonan di mas positivo ta e introduccion di e Digital Kindvolgsysteem (EKD). Esaki ta un paso gigante den modernisacion cu lo permiti un miho coordinacion entre salud, scol y instancianan di ayudo. E sistema aki lo percura cu ningun mucha ta keda sin e atencion cu e merece. Ademas, a papia encuanto fortalisacion di e programa di vacuna y e monitoreo continuo di e crecemento y desaroyo di nos mucha y hobennan.
E meta pa e periodo 2026-2030 ta ambicioso y positivo: un JGZ mas fuerte, cu miho base legal atraves di e Landsverordening Publieke Gezondheid, y un rol central den e red di cuido integral pa nos hubentud.
Maske e vision ta positivo, e reunion a sirbi tambe pa identifica areanan cu mester di extra atencion y inversion pa por logra e metanan aki.
Parlamento ta gradici e team di JGZ pa nan dedicacion y transparencia. E comision a compromete su mes pa keda monitoria e desaroyonan y pa duna e sosten necesario pa logra cu e vision di un hubentud sano ta bira un realidad concreto pa cada hogar na Aruba.
