Durante e debate den Parlamento riba e prome presupuesto supletorio, di dia 6 di november 2026, e miembro di Parlamento pa fraccion di MEP, Shailiny Tromp-Lee, a expresa su profundo preocupacion y cuestionamento pa e falta di seriedad, claridad y transparencia di parti di Prome Minister Mike Eman encuanto su retiro anuncia y e proceso di sucesion entrante 1 di januari 2027.
Durante e reunion publico Tromp-Lee a duna di conoce cu falta apenas 56 dia pa yega e fecha cu e propio Minister President Mike Eman a stipula pa su salida, y toch ni Parlamento ni pueblo di Aruba no sa ken lo tuma e stuur over. Alabes Tromp-Lee a subraya cu esaki ta tumando luga den un ambiente di instabilidad y conflicto interno den Gobierno. “Nos ta enfrentando un traspaso meymey di un tension completo, caminda den e gobernacion no tin comunicacion y via media nan ta ataca y insulta otro.”
Tromp-Lee a critica e antecedentenan di e coalicion aki cu a demostra di ta mara na conflicto continuo y power play, locual ta crea mas temor pa loke ta bay pasa ora e momento di e cambio di liderazgo yega. Segun e parlamentario, Aruba no mag di keda victima di mas tardansa of discusion interno cu ta paralisa e pais. Nos tur sa con complica tabata pa e gobierno aki forma, prome tabata Mike de Meza cu no por a bira minister, djey ta cu Desiree Croes no por a bira Minister Plenipotenciario, y asina nos por sigui menciona nan matrimonio yena di menasa y power play.
Tromp-Lee a indica cu e ta tene su curason ora e “Cuanto vale el show” ta bay cuminsa y ata Mike Eman ta bolter cos atrobe y na luga di loke caya ta papia cu ta Dowers ta bira Minister-President, e ta bin cu Cicilia. Un otro discucion cu segun Tromp-Lee lo conduci na tardansa y insiguridad.
P’esey mes Parlamentario Tromp-Lee mester a coregi Prome Minister Eman: “no ta ‘curioso’ mi ta, sino hopi preocupa. E funcion di Minister-President no ta un asunto priva di un partido so; e ta un responsabilidad publico cu tin impacto directo riba e direccion, e gobernacion y e stabilidad di nos pais,” Tromp-Lee a enfatisa.
E parlamentario a recorda cu dia 16 di juni 2026, Fraccion di MEP a solicita un reunion publico pa trata e proceso di sucesion y e garantianan pa un transicion ordena, pero te cu awe e reunion ey no a wordo yama.
Tromp-Lee a puntra Minister-President Mike Eman pakico e no ta brinda transparencia, pasobra Parlamento tin un deber constitucional pa exigi claridad den interes di pueblo. “Mi a pidi Minister-President Mike Eman pa brinda e claridad necesario durante e reunion publico, pero lastimamente el a actua completamente indiferente”, Tromp-Lee a duna di conoce.
“Nos ta bay sigui exigi respet pa e proceso democratico y pa e pueblo di Aruba. Un asunto di e magnitud aki no mag di keda trata cu informalidad, den secreto partidario ni a costa di e stabilidad di nos pais,” Tromp-Lee a conclui.
