Dia 9 di maart a tuma luga un ceremonia di conmemoracion di e anker historico, un simbolo importante di herencia cultural y identidad di Aruba. Durante e acto, varios orador a recorda e historia y significado di e monumento, cu pa decada a representa stabilidad y perseverancia di e pueblo Rubiano.
Durante e ceremonia, Leon M. Berenos a comparti e trasfondo historico di e simbolo aki, den presencia di Prome Minister Mike Eman, Minister di Turismo Wendrick Cicilia, famia di Charlie Brouns Jr. y invitadonan.
Prome Minister Mike Eman a expresa su emocion di por celebra e momento aki hunto cu e famia Brouns. Segun Premier Eman, e anker, instala tambe como un homenahe na Charlie Brouns Sr. y Charlie Brouns Jr., dos generacion cu a hunga un papel importante den historia di Aruba y su desaroyo turistico.
“E bar di Charlie Brouns ta un di e luganan emblematico cu hopi turista ta bishita ora nan yega Aruba. E tres generacion di e famia a contribui hopi na turismo di Aruba y na e manera special cu Aruba ta ricibi su bishitantenan,” Eman a comenta.
Segun Prome Minister, e anker, instala dia 31 di maart 1985, a bira un simbolo cu pa aña a recorda e relacion entre historia, turismo y identidad di Aruba.
Segun Berenos, e historia di e simbolo aki ta conecta cu e legado di Charlie Brouns Sr., kende a establece su bida na Aruba despues di a nace na Hulanda. Hunto cu su esposa Marie, el a funda un negoshi cu despues di varios aña a evoluciona den un punto di encuentro marino importante, trahadonan di industria petrolero y bishitante na Aruba.
Den 1941 el a habri Charlie’s Bar, un establecimento, cu despues di 36 aña a pasa na su yiu Charlie Brouns Jr., kende a sigui desaroya e legado familiar. Mas despues, e tradicion a sigui cu Charlie Brouns III, manteniendo e herencia cultural y comercial di e famia.
Un di e momentonan historico mas notabel tabata e colocacion di e anker historico dia 31 di maart 1985. E anker, un piesa di origen Aleman, instala na Aruba y desde e tempo ey a bira un simbolo di forsa, stabilidad y resiliencia.
“Tur pais tin su simbolonan,” Berenos a splica, comparando e anker di Aruba cu monumentonan mundial manera Statue of Liberty na New York. E anker ta representa e caracter di Aruba: un isla cu, apesar di diferente desafio historico, semper a logra mantene su rumbo y fortalesa.
Durante e ceremonia tambe a hiba palabra Charlie Brouns III, kende a enfatisa e importancia di conta historia di Aruba den forma corecto y preserva su legado pa generacionnan futuro.
“Nos ta un isla chikito pero nos tin un curason grandi,” Brouns a expresa, resaltando e orguyo nacional y e resiliencia cu ta caracterisa e pueblo Arubiano.
Contribucion di comunidad
Durante e conmemoracion tambe a reconoce e contribucion di Wilhelm Geerman, miho conoci como Bill, kende voluntariamente a participa activamente den instalacion di e anker na Colony.
Su yiunan Alvin y Edith Geerman a comparti cu nan tata tabata un persona hopi dedica na comunidad di San Nicolas. Hunto cu Robby Brinkman, un constructor di boto, y Charlie di Charlie’s Bar, nan a forma parti di e grupo cu a traha pa coloca e anker.
Segun nan, Geerman tabata un persona cu semper tabata kier sirbi su comunidad. Despues di su retiro di Lago, el a sigui activo den diferente iniciativa comunitario y cultural.
Pa mas cu 40 aña, e anker a keda firme apesar di tempestad y cambio den historia di e isla. Pa hopi residente y bishitante, e monumento a bira un punto nacional cu ta recorda e fortalesa y perseverancia di Aruba.
E mensahe central di e ceremonia: e anker historico ta simbolisa e capacidad di Aruba pa mantene firme, preserva su herencia cultural y sigui avansa cu orguyo como pueblo.
