Diabierna a marca seis aña desde cu COVID-19 a impacta Aruba pa prome biaha, un momento cu a cambia nos isla, nos manera di biba y nos sistema di salud profundamente.
Na maart 2020, Aruba manera hopi pais rond mundo, a enfrenta un situacion cu ningun persona tabata prepara p’e. Den cuestion di dianan, nos isla a pasa di un bida normal pa un realidad nobo: fronteranan a cera, skolnan a cera, eventonan social a para, y hopi famia a haya nan mes adaptando na un manera di biba cu distancia social, cuarentena, shelter in place y incertidumbre.
Pa hopi persona, e periodo aki a trece preocupacion, sacrificio y tristesa. Nos a perde 226 miembro di nos comunidad debi na complicacion relaciona cu COVID-19. Awe nos ta recorda nan cu respet y solidaridad y tur famia y persona cu a pasa door di e perdida aki of cu kisas ainda ta biba cu consecuencia di e virus di COVID-19.
Pero memei di e reto grandi, Aruba tambe a mustra algo poderoso: resiliencia, cooperacion y solidaridad.
Personal medico, enfermeronan, laboratorionan, personal di salud publico, Gobernantenan, ministerionan, expertonan cu a duna apoyo y guia y hopi otro profesional a traha incansablemente pa proteha nos comunidad. E decisionnan dificil cu mester a wordo tuma durante e periodo aki a exigi dedicacion, responsabilidad y colaboracion entre diferente institucion y sector di sociedad.
Negoshinan, scolnan, organisacionnan y ciudadano comun a adapta nan rutina pa contribui na e esfuersonan pa controla contagio y proteha esnan mas vulnerabel.
Durante e periodo aki nos a siña hopi les importante:
- Importancia di un sistema di salud publico fuerte y importancia di preparacion pa emergencia
- Balor di ciencia, investigacion y informacion confiabel
- Forsa di solidaridad y union den comunidad
- Y con lihe un situacion global por impacta un isla chikito manera Aruba
COVID-19 a cambia hopi di nos custumbernan, pero tambe a corda nos cu salud ta un responsabilidad comparti.
Seis aña despues, e reflexion principal ta cu preparacion, colaboracion y confiansa den informacion confiabel ta esencial pa proteha bienestar di nos poblacion y pa salba bida. E experiencia aki ta recorda nos cu ora nos enfrenta reto inespera, Aruba tin e capacidad pa adapta, cuida otro y sigui avansa hunto.
Directie Volksgezondheid ta invita comunidad pa tuma un momento awe pa reflexiona riba e experiencia comparti den e pandemia, recorda esnan cu nos a perde, y mantene e compromiso di salud, solidaridad y preparacion pa den futuro.
Bo salud, nos prioridad.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, of Follow nos den WhatsApp Channel, subi nos website www.dvg.aw, yama nos na 5224200 of mail nos na servicio@dvg.aw
