Riba e dia historico aki, 18 di maart 2026, caminda Aruba ta celebra 50 aña di su Himno y Bandera y ta drenta den e di 40 aña di su Status Aparte, mi ta haci un yamada pa uninion y determinacion pa defende e autonomia cu a costa tanto sacrificio pa logra.
Como Presidente di e Comision di Finansa, Organizacion di Gobierno, Cultura y Deporte den Parlamento, mi kier enfatisa cu e celebracion di e aña aki tin un nificacion profundo. Nos Himno ta duna nos bos, nos Bandera ta duna nos cara den mundo. Awe nos ta recorda cu nos no ta djis un isla, nos ta un nacion cu a sa di asumi e mando di su propio destino.
Un legado bou di presion
Reflehando riba nos historia mi mester enfatisa cu e lucha pa autonomia no a termina na 1986. E presionnan cu nos ta sinti awe riba nos Status Aparte ta recorda nos cu libertad mester wordo defendi tur dia. No ta basta pa djis recorda e historia, nos tin e deber di biba e balornan di integridad y vision cu a funda nos Status Aparte.
Finansa y Cultura: E motor di nos autonomia
Como parlamentario mi kier subraya awe cu un autonomia fuerte ta rekeri un fundeshi financiero solido y un identidad cultural bibo. Nos no a hereda e tera aki di nos antepasadonan, nos a fi’e di nos yiunan. P’esei, cada decision cu nos tuma den Parlamento awe mester ta dirigi riba e Aruba cu nos kier laga atras pa e siguiente generacion.
Un mensahe di gratitud
Mi ta finalisa deseando henter e pueblo di Aruba, tanto esnan akinan como esnan den exterior, un feliz Dia Nacional, Dia di nos Himno y Bandera. Ban celebra cu orguyo, pero tambe cu e compromiso firme di keda uni. Ora nos ta uni como un solo pueblo, no tin presion externo cu por kibra nos boluntad di ta Baas di nos mesun cas.
Pabien Aruba!
