Durante e reunion publico solemne teni mainta den Parlamento di Aruba cu presencia di invitadonan internacional for di e otro islanan den Reino, Lider di Fraccion di AVP, Jennifer Arends-Reyes, a enfatisa e importancia di reflexion, unidad y responsabilidad riba ocasion di e dobel aniversario historico: 40 aña di Status Aparte y 50 aña di Himno y Bandera di Aruba.
Den su discurso, Arends-Reyes a destaca cu e momento aki no solamente ta uno pa mira atras cu orguyo, pero tambe pa enfoca riba futuro cu sentido di responsabilidad. “Status Aparte a confirma cu Aruba tabatin e madurez politico y determinacion pa traha su propio rumbo den Reino,”e la expresa.
E lider di fraccion AVP a uza e ocasion pa expresa su sincero gradicimento na tur estadistanan cu a contribui na desaroyo di Aruba, tanto den pasado como presente. E la reconoce nan sacrificio, liderazgo y compromiso, indicando cu nan trabou a forma e base riba cual Aruba ta para awe.
“Nan a construi brugnan, habri camindanan y a asumi responsabilidad pa beneficio di pueblo y pais. Como representante di pueblo, mi ta bisa: danki,” Arends-Reyes a declara.
Ademas, e la resalta e balor simbolico di e Himno y Bandera, cu a bira representacion di unidad, identidad y speransa pa pueblo di Aruba. Segun Arends-Reyes, e simbolonan nacional ta recorda nos cu, apesar di diferencia di opinion politico, amor pa Aruba ta uni nos tur.
Arends-Reyes tambe a enfatisa cu e miho manera pa honra e legado di pasado ta pa sigui cu gobernacion responsabel, disciplina y decisionnan cu tin e bienestar di futuro generacionnan como prioridad. E la reconoce cu Aruba ta enfrenta diverso reto economico, social y ambiental, pero a mustra confiansa den capacidad di e pueblo pa logra progreso ora ta pone interes general prome.
Na su mensahe na comunidad, e la recalca cu e celebracion aki ta pertenece na tur ciudadano di Aruba, sin distincion politico. “E ta di cada hende cu ta contribui na desaroyo di nos isla, di cada mayor cu a pasa balor y tradicion, y di cada hoben cu ta soña grandi,” e la bisa.
Finalmente, Arends-Reyes a haci un yamada pa fortalece democracia, proteha identidad nacional y sigui traha pa un Aruba cu ta ofrece oportunidad, siguridad y bienestar pa tur.
Cu un mensahe di fe y unidad, e la conclui: “Cu Dios bendiciona nos isla y tur su habitantenan. Biba 50 aña di nos Himno y Bandera, biba 40 aña di Status Aparte, y cu profundo orguyo: Biba Aruba.
