ORANJESTAD – Durante un reunion cu organisacionnan di centro di bario y cu CEDE Aruba, a sali na cla cu e veld social na Aruba ta enfrenta un situacion preocupante. Segun CEDE Aruba, despues di 2018 tabata tin hopi fondo disponibel pa reforsa e sector social. E inversionnan ey a yuda pa lanta y fortalece diferente iniciativa y programa pa sostene nos comunidad.
Sinembargo, CEDE Aruba a indica cu actualmente e fondonan ey a caba. Consecuencia di esaki ta cu hopi organisacion y iniciativa social a bolbe practicamente na “square one”, sin e base financiero necesario pa continua cu nan trabao importante den nos comunidad.
E realidad ey ta mustra cu e necesidad pa mas fondo den e campo social ta urgente. Tin un demanda creciente pa sosten pa programa social, pa guia hubentud, pa yuda famianan vulnerabel y pa mantene iniciativa comunitario den barionan.
Na mes momento, e gobierno actual a reserva 70 miyon florin pa un fondo di inversion. Te ainda, sinembargo, no a presenta plan concreto tocante con e fondo ey lo wordo utilisa. Mientras tanto, e veld social, cu ta traha tur dia directamente cu nos comunidad, ta sinti falta di sosten.
Lamentablemente, na mes momento e gobierno di AVP y Futuro a dicidi riba nan prome dia di trabou, pa corta 6.2 miyon florin for di fondo destina pa e sector social. E decision aki ta manda un señal ekiboca den un momento caminda e necesidad ta mas grandi cu nunca.
Nos ta kere firmemente cu inversion den e veld social no ta un gasto, pero un inversion den stabilidad social, prevencion y bienestar di nos comunidad. Organisacionnan social ta e prome linea di sosten pa hopi ciudadano y famia.
P’esey nos ta urgi e gobierno di AVP y Futuro pa pone prioridad real na e veld social. E necesidadnan ta cla, e organisacionnan ta haci trabao valioso, y nos comunidad ta depende di nan.
Aruba mester di un gobierno cu ta comprende cu fortalesemento di e veld social ta fundamental pa un sociedad fuerte y balansa.
