Turismo ta e pilar principal di economia di Aruba. Pero, hunto cu crecemento, nos ta sinti tambe e presion riba trafico, vivienda, infrastructura y nos medio ambiente. Nos gobierno, Gabinete Wever-Croes 2, a scoge pa cambia e rumbo, pa un rumbo nobo: High Value, Low Impact tourism. Esaki kiermen: crea mas balor economico cu menos presion riba nos pais y nos comunidad. Esaki tabata basa riba e deseo cu a bin for di nos comunidad despues di pandemia.
Pero nos no ta mira cu e maneho aki ta wordo ehecuta door di e gobierno actual. Al contrario, nos ta mira cu e maneho actual ta pa crea mas vuelo aereo pa Aruba y pa aumenta e cantidad di turistanan cu ta bin Aruba. Esey no ta baha e presion ni e impacto. Esey ta aumenta e impacto, mientras cu hopi hende na Aruba no kier esey.
Y p’esey ta importante pa nos haci nos mes un pregunta honesto: nos kier mas turista, of nos kier mas balor di turismo?
Realidad ta cu expansion di asientonan aereo y crecemento den cantidad di bishitante ta haci dificil pa baha e impacto. Aruba no por sigui crece sin defini limite y sin crea un balansa cla entre economia, comunidad y medio ambiente.
Turismo no ta solamente un tema economico. E ta toca calidad di bida, costo di bida, vivienda, naturalesa y futuro di nos pais.
Si nos kier un modelo berdadero di High Value, Low Impact, nos mester:
- No solamente mira cantidad, sino specialmente balor
- Proteha nos capacidad di carga
- Inverti den calidad di bida
- Percura cu mas di nos economia local ta beneficia di turismo
Aruba ta na un crusada: no pa ta e mas grandi, pero pa ta e destinacion mihor maneha y mas balansa.
“Exito bo no ta midi den cuanto nos ta crece, sino den con nos ta crece.” Esey ta e berdadero reto pa futuro di Aruba. Y desde Parlamento, nos fraccion di MEP lo tuma iniciativa pa logra ehecuta e vision High Value, Low Impact di berdad.
